Heilsueflandi útivist
Í Kópavogi er að finna fjölmörg útivistarsvæði. Strandlengja, dalir, garðar, leiksvæði og göngu- og hjólastígar skapa góðar aðstæður til útiveru og hreyfingar fyrir fólk á öllum aldri.
Heilsueflandi samfélag
Kópavogsbær hefur verið þátttakandi í verkefninu Heilsueflandi samfélag frá árinu 2015. Bærinn hefur frá þeim tíma markað sér lýðheilsustefnu og nær núverandi stefna til ársins 2025.
Lýðheilsa íbúa er eitt af forgangsmálum Kópavogsbæjar og birtist það skýrt í lýðheilsustefnu bæjarins. Í aðgerðaáætlun, sem byggir á lýðheilsustefnunni eru verkefni skilgreind með áherslu á að efla líkamlega, andlega og félagslega vellíðan bæjarbúa.
Í starfinu er stuðst við gagnreyndar aðferðir, fylgst með rannsóknum á sviðinu og árangri starfsins í gegnum lýðheilsuvísa. Leitast er við að hafa samráð við íbúa og aðra hagsmunaaðila bæjarins við þróun nýrra verkefna.
Kópavogsbær tekur m.a. þátt í verkefninu Heilsueflandi samfélag undir formerkjum Embættis Landlæknis.
Í núverandi lýðheilsustefnu er lögð áhersla á fjögur svið:
- Umhverfi
- Geðrækt
- Næring og hreyfing
- Forvarnir og heilsuefling
Kópavogsbær hefur innleitt Barnasáttmála sameinuðu þjóðanna og hefur hlotið viðurkenningu Unicef sem Barnvænt sveitarfélag. Lýðheilsustarf tekur mið af þessu og sérstök áhersla er lögð á að hlúa að heilsu og líðan barna og fjölskyldna.
Fjölmörg lýðheilsuverkefni snúa að því að efla hreysti eldri borgara í Kópavogi. Eitt þeirra er verkefnið Virkni og vellíðan sem er hreyfiúrræði fyrir 60 ára og eldri. Þá eru ýmis önnur hreyfiúrræði í boði í félagsmiðstöðvum bæjarins og í heimaþjónustu.
Ein megin áhersla bæjarins er að skapa aðstæður fyrir íbúa til að ástunda útivist og hreyfingu auk þess sem Kópavogsbær hefur Geðræktarhús þar sem haldnir eru fundir og námskeið til að efla andlega heilsu. Sveitarfélagið hefur innleitt heimsmarkmiðin og leggur þannig drög að sjálfbærri þróun og tekur þátt í að bæta hin efnahagslegu, félagslegu og umhverfislegu áhrif á lýðheilsu.
Opin svæði
Bæjarland Kópavogs er kjörið til útivistar og þar má finna fjöldann allan af fjölbreyttum og skemmtilegum opnum svæðum. Meðal þeirra eru strandlengjan á Kársnesi, Kópavogsdalur, Fossvogsdalur og Borgarholt. Einnig eru þar falleg garðsvæði eins og Rútstún, Hlíðargarður, trjásafnið í Meltungu í Fossvogsdal og Guðmundarlundur.
Leiksvæði
Í bænum eru á sjötta tug opinna leiksvæða. Þjónustumiðstöð sér um viðhald þeirra og tekur við ábendingum um lagfæringar.
Skógræktar- og uppgræðslusvæði
Eiginleg skógrækt í landi Kópavogs hófst árið 1990 með Landgræðsluskógaverkefni. Um 650 hektara landsvæðis í Kópavogi er skilgreint fyrir skógrækt og uppgræðslu og eru þau svæði að finna í Vatnsendalandi og Lækjarbotnum.
Fróðleiksskilti
Undanfarna tvo áratugi hafa fróðleiksskilti verið sett upp víða í Kópavogi. Á þeim má finna upplýsingar um fjölbreytt efni, meðal annars náttúruminjar, þjóðtrú og dýralíf. Frá árinu 2012 hafa sum skiltanna verið sett upp í samstarfi við Sögufélag Kópavogs og hefur Umhverfis- og samgöngunefnd haft umsjón með staðsetningu þeirra og frágangi.
Skiltunum er ætlað að fræða bæjarbúa um umhverfið og varpa ljósi á sögu bæjarins.
Göngu- og hjólastígar
Stígakerfi Kópavogsbæjar skiptist upp í stofnleiðir, tengileiðir og almenna stíga. Stofnleiðir eru helstu samgöngustígarnir og eru greiðfærir, vel þjónustaðir allt árið og með forgang fram yfir hliðarumferð.
Tengistígar tengja stofnleiðir við almenna stíga og þéttbýlissvæði. Til þeirra teljast meðal annars tómstunda- og útivistarstígar sem eru aðallega nýttir til afþreyingar. Almennir stígar eru allir aðrir stígar sem falla ekki undir þessar skilgreiningar.
Samgöngusáttmáli höfuðborgarsvæðisins, sem var undirritaður árið 2019, felur í sér sameiginlega áætlun um uppbyggingu samgönguinnviða til ársins 2033. Með sáttmálanum verður fjárfest í uppbyggingu stofnleiða fyrir gangandi og hjólandi um allt höfuðborgarsvæðið.
Helstu stígar í stígakerfi Kópavogs fá vetrarþjónustu en nánar má lesa um fyrirkomulagið hér.
Hljóðgöngur
Flanerí eru hljóðgöngur um sögu og samtíma í hlaðvarpsformi. Hljóðgöngur þekkjast víða um heim þar sem þær flétta saman útiveru, hreyfingu, sögu, borg og upplifun. Flanerí er hins vegar nýjung í íslensku menningarlandslagi sem tengir sögu- og menningargöngur við nútímatækni og þægindi.