Óskað eftir upplýsingum varðandi uppbyggingu íbúðarhúsnæðis í Kópavogi á yfirstandandi kjörtímabili. Beiðni frá Pétri Hrafni Sigurðssyni bæjarfulltrúa

Frá fjármálastjóra, dags. 1. maí, svar við fyrrispurn Péturs Hrafns Sigurðssonar um uppbyggingu íbúðarhúsnæðis.

Lagt fram.

Pétur Hrafn Sigurðsson lagði fram eftirfarandi bókun:

Ég þakka svörin sem leiða það í ljós að Kópavogur hefur ekki úthlutað einni einustu lóð til húsnæðissamvinnufélaga sem eru ekki hagnaðardrifin, ekki til húsnæðisfélaga námsmanna, eldri borgara eða til húsnæðisfélaga verkalýðsfélaganna. Tillögur bæjarfulltrúa Samfylkingarinnar um úthlutun til þessara hópa voru felldar. Lóðir hafa farið til verktaka á einkamarkaði sem byggja til að hagnast á sölu íbúðanna.

Pétur Hrafn Sigurðsson"

Margrét Júlía Rafnsdóttir tók undir bókun Péturs Hrafns Sigurðssonar.

Ármann Kr. Ólafsson, bæjarstjóri, lagði fram eftirfarandi bókun:

"Kópavogsbær á um 450 félagslegar leiguíbúðir sem er hlutfallslega mest meðal sveitarfélaga á höfuðborgarsvæðinu að Reykjavík undanskilinni. Eins og fram kemur í svarinu þá hefur verið fjárfest í og keypt í félagslegum húsnæðisúrræðum sem fjölgar þeim um rúmlega 50. Varðandi leigufélög án hagnaðarsjónarmiða er vakin athygli á miklum hagnaði þeirra og ótrúlega hárri leigu.

Ármann Kr. Ólafsson"

Pétur Hrafn Sigurðsson lagði fram eftirfarandi bókun:

"Það er ódýrt að bera sig saman við sveitarfélög á höfuðborgarsvæðinu utan Reykjavíkur þegar félagsleg húsnæðisúrræði eru annars vegar enda hafa þau flest staðið sig hörmulega í málaflokknum undir stjórn Sjálfstæðisflokksins.

Því er mótmælt að húsnæðisfélög námsmanna, eldri borgara eða fyrirhuguð húsnæðisfélög verkalýðshreyfingarinar bjóði upp á okurleigu

Pétur Hrafn Sigurðsson"

Ármann Kr. Ólafsson, bæjarstjóri, lagði fram eftirfarandi bókun:

"Hér var ekki verið að vísa til húsnæðisfélaga námsmanna. Kópavogur stenst allan samanburð þegar kemur að félagslegu húsnæði og lætur nærri að Kópavogsbær eigi hátt í 5% íbúða í fjölbýlishúsum í bænum.

Ármann Kr. Ólafsson"

Frá Pétri Hrafni Sigurðssyni, ítrekar beiðni sína eftir upplýsingum varðandi uppbyggingu íbúðarhúsnæðis í Kópavogi á yfirstandandi kjörtímabili.

Lagt fram.

Frá Pétri Hrafni Sigurðssyni, óskar eftir upplýsingum varðandi uppbyggingu íbúðarhúsnæðis í Kópavogi á yfirstandani kjörtímabili.

Ármann Kr. Ólafsson, bæjarstjóri, lagði fram eftirfarandi bókun:

"Á sviðstjórafundi þann 5. mars sl. fól undirritaður bæjarritara og fjármálastjóra bæjarins að skrifa greinargerð um framvindu húsnæðismála í kjölfar húsnæðisskýrslu, sem unnin var í þverpólitískri sátt allra flokka í bæjarstjórn Kópavogs. Greinargerðin mun liggja fyrir fljótlega en hún mun innihalda svör við þeim fyrirspurnum sem hér eru lagðar fram af bæjarfulltrúanum.

Ármann Kr. Ólafsson"