Breytingar á skipulagi og starfsumhverfi leikskóla Kópavogsbæjar - Viðhorfskannanir

Frá sviðsstjóra menntasviðs, lagt fram svar fyrir fyrirspurn bæjarfulltrúa Pírata varðandi mönnun á leikskólum í Kópavogi.

Lagt fram.

Lagt fram minnisblað sem lagt var fram í bæjarráði 10. apríl 2025

Lagt fram og umræður.

Á 3201. fundar bæjarráðs þann 23.01.2025 fór fram kynning á niðurstöðum starfsmanna- og foreldrakönnunar í leikskólum Kópavogs sem framkvæmd var sumarið 2024. Bæjarráð samþykkti á þeim fundi að óska eftir minnisblaði sviðsstjóra menntasviðs um stöðu breytinga kerfisins út frá þeim markmiðum sem sett voru í upphafi. Nú lagt fram svar sviðsstjóra dags. 08.04.2025.

Lagt fram og kynnt.

Umræður.

Gestir véku af fundi kl. 10:58.

Bókun:

"Í minnisblaðinu kemur fram að skólaárið 2023-2024 hafi engin tilfelli átt sér stað þar sem loka þurfti deild, og sama gildi það sem af er skólaárinu 2025. Undirrituð óskar eftir upplýsingum um:

1. Fjölda daga sem starfsemi einstakra deilda í leikskólum bæjarins hefur verið rekin undir viðmiðum um öryggismörk, bæði skólaárið 2023-2024 og það sem af er skólaárinu 2025.

2. Hvernig haldið er utan um skráningar um slík tilvik.

3. Hvort og þá hvernig foreldrum sé tilkynnt ef barnahópurinn er undir umsjón færri starfsmanna en öryggismörk gera ráð fyrir.

Markmiðið með beiðninni er að fá betri innsýn í raunverulega stöðu mönnunar í leikskólum bæjarins, sérstaklega með hliðsjón af því að markmið breytinganna var að tryggja fullnægjandi viðveru starfsfólks með börnum."

Sigurbjörg E. Egilsdóttir

Kynning á niðurstöðum starfsmanna- og foreldrakönnunar í leikskólum Kópavogs sem framkvæmd var sumarið 2024 á vegum Prósent.

Kynning og umræður.

Bæjarráð samþykkir að óska eftir minnisblaði sviðsstjóra menntasviðs um stöðu breytinga kerfisins út frá þeim markmiðum sem sett voru í upphafi.

Bókun:

"Undirrituð lýsa yfir áhyggjum af aðferðafræði kannana Kópavogsbæjar. Spurningar eru oft leiðandi og óskýrar. Til dæmis er óljóst hvort svarið „mjög ósammála“ við staðhæfingunni „Breytingar hafa dregið úr álagi í starfi“ merki að fólk upplifi aukið álag eða óbreytt ástand. Spurningar um starfsanda og svigrúm til undirbúnings faglegs starfs eru ekki settar fram á hlutlausan hátt og ekki mögulegt að lesa neikvæða útkomu úr niðurstöðunum. Þá er óþarfi að spyrja hvort stjórnendur upplifi aukinn áhuga á störfum í leikskólunum, væntanlega eru til tölur um mönnun og eftirspurn eftir störfum.

Niðurstöður foreldrakönnunar sýna takmarkaða ánægju með fyrirkomulagið. Aðeins 30% þeirra sem tóku afstöðu segjast sammála því að breytingarnar hafi haft jákvæð áhrif á líðan barnsins. Á sama tíma eru 21% ósammála, en sökum framsetningar er ómögulegt að meta hvort það endurspegli að áhrifin á líðan barnsins hafi verið neikvæð eða óbreytt. Spurningar um áhrif á fjárhagslegan ávinning og fjölgun gæðastunda eru jafnframt illa orðaðar og gefa litla innsýn. Að lokum eru óþarfar spurningar um t.d. „upplifun á auknum stöðugleika“ sem staðfesta má með fyrirliggjandi gögnum.

Til þess að tryggja að niðurstöður mælinga séu gagnlegar fyrir áframhaldandi þróun verkefnisins, er brýnt að huga að framsetningu spurninga."

Sigurbjörg E. Egilsdóttir

Theodóra S. Þorsteinsdóttir

Bergljót Kristinsdóttir

Kolbeinn Reginsson


Bókun:

"Markmiðið með Kópavogsmódelinu var að bæta stöðugleika í leikskólastarfi og vinna gegn langvarandi mönnunarvanda. Eftir breytingarnar hefur stöðugleiki í leikskólaþjónustu batnað verulega. Ekki hefur þurft að loka leikskólum sökum manneklu eða veikinda og breytingarnar hafa gert leikskólum sveitarfélagsins kleift að bjóða fleiri börnum leikskólapláss og stuðlað að betri þjónustu fyrir barnafjölskyldur í Kópavogi.

Það er gagnlegt að fá niðurstöður úr starfsmanna- og foreldrakönnunum enda gefa þær vísbendingar um upplifun notenda og starfsmanna. Niðurstöðurnar sýna að fleiri foreldrar eru ánægðir með breytingarnar en óánægðir. Í nýjustu könnun kemur fram að fleiri foreldrar telja breytingarnar hafa jákvæð áhrif á líðan barna sinna, og það er ánægjulegt að sjá að ánægjan hefur aukist á milli mælinga.

Tekjulægri heimili hafa verið sérstaklega ánægð með sveigjanleika og möguleikann á styttri dvalartíma, sem undirstrikar hversu mikilvægt það er að bjóða upp á fjölbreytt úrræði sem mæta ólíkum þörfum fjölskyldna.

Það er eðlilegt að meta framsetningu spurninga í könnunum reglulega og tryggja að þær séu skýrar og gefi sem besta innsýn í viðhorf og upplifun svarenda. Við þökkum ábendingar minnihlutans í þeim efnum og tökum þær til skoðunar með það að markmiði að bæta framkvæmd og framsetningu í framtíðinni."

Ásdís Kristjánsdóttir

Orri Hlöðversson

Hjördís Ýr Johnson

Andri Steinn Hilmarsson

Bókun:

"Þó að niðurstöður sýni ótvírætt jákvæðan árangur á vissum þáttum er mikilvægt að sýna auðmýkt gagnvart því að aðrir liðir þarfnist mögulega endurskoðunar. Varðandi fullyrðinguna „Niðurstöðurnar sýna að fleiri foreldrar eru ánægðir með breytingarnar en óánægðir“ er rétt að vekja athygli á því að 14% foreldra segjast mjög ánægðir en 16% mjög óánægðir. Undirrituð ítreka nauðsyn þess að rýna niðurstöðurnar með opnum huga og vilja til þess að bregðast við því sem betur má fara."

Sigurbjörg E. Egilsdóttir

Theodóra S. Þorsteinsdóttir

Bergljót Kristinsdóttir

Kolbeinn Reginsson

Kynning á niðurstöðum starfsmanna- og foreldrakönnunar í leikskólum Kópavogs sem framkvæmd var sumarið 2024 á vegum Prósent.

Frestað til næsta fundar.

Frá sviðsstjóra menntasviðs, dags. 13.02.2024, lagðar fram niðurstöður viðhorfskannana a verkefninu börnin í fyrsta sæti, starfsfólk og foreldar.

Lagt fram og kynnt.