Atvinna og nám
Kópavogsbær býður upp á úrræði sem styðja fatlað fólk í námi og starfi. Markmiðið er að efla færni, auka sjálfstæði og skapa tækifæri til virkrar þátttöku í samfélaginu.
Atvinna og starfsþjálfun
Vinnumálastofnun tekur á móti öllum umsóknum um verndaða vinnu, hæfingu og dagþjónustu.
Hæfing, starfsþjálfun og vernduð vinna miða að því að efla færni fatlaðs fólks og styðja þau við þátttöku í daglegu lífi og á vinnumarkaði.
Með hæfingu er átt við starfs- og félagsþjálfun í þeim tilgangi að draga úr áhrifum fötlunar og auka hæfni til starfa og þátttöku í daglegu lífi. Lögð er áhersla á þjálfun sem viðheldur og eykur starfsþrek, sjálfstæði í vinnubrögðum og félagslega færni.
Hæfingarstöðvar
Í Kópavogi er starfrækt hæfingarstöð og er Líney Óladóttir forstöðumaður.
- Dalvegur hæfingarstöð, sími 441 9820
Einstaklingum með fötlun/skerta starfsgetu stendur til boða að koma í tímabundna starfsprófun og starfsþjálfun í Örva. Sótt er um þessa þjónustu í gegnum Vinnumálastofnun. Markmið starfsprófunar og starfsþjálfunar er að meta hæfni einstaklinga til vinnu, auka verkfærni þeirra og veita þeim þjálfun áður en haldið er út á almennan vinnumarkað. Almennt gilda sömu reglur í Örva og á almennum vinnustöðum og reynt er að líkja eftir vinnuaðstæðum og kröfum sem búast má við á almennum vinnumarkaði.
- Örvi, forstöðumaður Birgitta Bóasdóttir, sími 441 9860
- Heimasíða Örva
- Facebook síða Örva
Fatlað fólk getur sótt um vinnu á vernduðum vinnustað, en lög gera einnig ráð fyrir að atvinna með stuðningi standi til boða á almennum vinnumarkaði.
Vernduðum vinnustöðum er ætlað
- að veita fötluðu fólki launaða starfsþjálfun svo að það verði hæfara til að starfa á almennum vinnumarkaði
- að veita fötluðu fólki föst störf
Vinnan er launuð samkvæmt sérstökum kjarasamningi sem byggir á samkomulagi Alþýðusambands Íslands og Hlutverks – samtaka um vinnu og verkþjálfun.
Atvinna með stuðningi (AMS) felur í sér stuðning við fólk sem hefur skerta starfsgetu vegna fötlunar. Það fær aðstoð við að finna starf við hæfi á almennum vinnumarkaði og stuðning við að sinna því.
Atvinna með stuðningi er starfrækt hjá Vinnumálastofnun höfuðborgarsvæðisins, Kringlunni 1, 105 Reykjavík. Síminn er 515 4850. Nánari upplýsingar má nálgast hér.
Styrkir
Styrkir til náms og tækjakaupa.
Námsstyrkir fyrir námskeiðsgjöldum, skólagjöldum og námsgögnum.
Styrkir vegna verkfæra- og tækjakaupa til að skapa atvinnutækifæri.