Barnavernd
Öll höfum við tilkynningarskyldu samkvæmt barnaverndarlögum og skiptir hún gríðarmiklu máli fyrir velferð barna.
Þú getur óskað eftir að tilkynning sé nafnlaus gagnvart þeim sem hún snýr að.
Öll börn eiga rétt á vernd og umönnun.
Mikilvægt er að hafa samband við barnavernd ef þú hefur áhyggjur af barni.
Það á til dæmis við ef:
- barn býr við erfiðar aðstæður
- uppeldi er ekki viðeigandi
- barn sýnir áhættuhegðun
Einnig er mikilvægt að láta vita ef áhyggjur eru af heilsu eða öryggi ófædds barns, til dæmis vegna lífernis á meðgöngu.
Þú mátt skila á þínu móðurmáli, ef þú vilt.
You may write in your mother´s tongue, if you prefer.
Możesz napisać w swoim ojczystym języku, jeśli chcesz.
Í neyð hringið í 112
Hægt er að senda tilkynningu til barnaverndar á netfangið barnavernd(hjá)kopavogur.is eða hringja í síma 441-0000 á opnunartíma Þjónustuvers Kópavogsbæjar.
Utan opnunartíma, á kvöldin og um helgar, er hægt að fá samband við bakvakt barnaverndar í gegnum Neyðarlínuna 112.
Tilkynning til barnaverndar er beiðni um stuðning og aðstoð fyrir barnið og fjölskyldu þess. Starfsfólk leggur áherslu á samstarf við börn og foreldra og sýnir nærgætni og virðingu í öllum samskiptum.
Fyllsta trúnaðar er gætt.
Barnaverndaþjónusta Kópavogs
Starfsmenn barnaverndar vinna samkvæmt barnaverndarlögum nr. 80/2002. Unnið er að því að börn sem búa við óviðunandi aðstæður eða börn sem sýna áhættuhegðun fái nauðsynlega aðstoð.
Ferli barnaverndarmáls er á þann veg að þegar tilkynning berst til barnaverndar um vanrækslu, ofbeldi eða áhættuhegðun barns taka starfsmenn ákvörðun um hvort hefja skuli könnun málsins. Foreldrum er sent bréf til upplýsingar um að tilkynning hafi borist. Tilkynnanda er einnig sent bréf til staðfestingar á móttöku tilkynningar auk þess sem veittar eru almennar upplýsingar um málsmeðferðina.
Við vinnslu barnaverndarmála er megin áhersla lögð á aðstæður og líðan barna, að talað sé við börnin og að þau fái að koma sjónarmiðum sínum og skoðunum á framfæri. Áhersla er jafnframt lögð á samvinnu við foreldra og samstarf er haft við aðrar fagstéttir sem koma að málefnum barna þegar það á við.
Fyllsta trúnaðar er gætt.
Tilkynningarhnappur til barnaverndar
Á spjaldtölvum nemenda í 5.–10. bekk í grunnskólum Kópavogs er sérstakur hnappur sem veitir aðgang að síðu þar sem börn geta sagt frá líðan sinni, áhyggjum eða aðstæðum og óskað eftir aðstoð.
Þegar barn sendir beiðni hefur starfsmaður barnaverndar samband til að afla nánari upplýsinga. Foreldrar eru upplýstir ef ástæða þykir til. Úrvinnsla fer eftir verkferlum barnaverndar.
Myndbönd hér að neðan veita frekari upplýsingar um tilgang hnappsins og hlutverk barnaverndar.
Kópavogsbær vinnur að innleiðingu Barnasáttmála Sameinuðu þjóðanna. Þar er meðal annars lögð áhersla á rétt barna til að tjá sig um eigin málefni (12. grein).
Sálfræðingar barnaverndar veita börnum og foreldrum stuðnings- og meðferðarviðtöl, aðallega byggð á aðferðum hugrænnar atferlismeðferðar.
Þeir veita einnig almenna uppeldisráðgjöf til foreldra sem fá stuðning barnaverndar.
Samkvæmt barnaverndarlögum skulu barnaverndarnefndir hafa tiltækar stuðningsfjölskyldur. Markmiðið er að tryggja öryggi barna, létta álagi af fjölskyldum og styðja foreldra í uppeldishlutverki sínu.
Persónulegir ráðgjafar styðja börn félagslega og tilfinningalega, meðal annars í tengslum við tómstundir, nám og vinnu. Verkefnin eru fjölbreytt og byggja á trausti og góðu sambandi við barnið.
Starfsmenn í tilsjón styðja fjölskyldur inni á heimilum þeirra. Stuðningurinn felst meðal annars í uppeldisráðgjöf, samstarfi við aðrar stofnanir og aðstoð við skipulag daglegs lífs.
Barnavernd hefur aðgang að vistheimili til að taka á móti börnum í bráðatilvikum. Lögð er áhersla á að börn haldi áfram skólagöngu, tómstundum og tengslum við vini meðan á dvöl stendur.
Saman gegn ofbeldi er samstarfsverkefni velferðarsviðs og lögreglunnar á höfuðborgarsvæðinu. Samstarfið felst í ákveðnu verklagi þegar tilkynningar berast um heimilisofbeldi.