Sjálfbærniskýrsla 2021

Fyrsta sjálfbærniskýrsla Kópavogs hefur litið dagsins ljós. Í skýrslunni kemur glöggt í ljós hversu viðamikil og fjölbreytt verkefni eru á könnu sveitarfélagsins. Hér er þó ekki ætlunin að tíunda þau öll heldur varpa ljósi á verkefni
sem falla að markmiðum Kópavogsbæjar um innleiðingu Heimsmarkmiða Sameinuðu þjóðanna um sjálfbæra þróun.

Innleiðing þeirra er hluti af viðamikilli stefnumótun sem átt hefur sér stað undanfarin ár hjá Kópavogsbæ og grunnur var lagður að í Bæjarstjórn Kópavogs með samþykkt heildarstefnu Kópavogsbæjar.

Markmið Kópavogsbæjar er að tryggja þróun sjálfbærni í sveitarfélaginu og lífsgæði íbúa bæjarins. Til þess að svo megi verða höfum við haldið stefnumótunarvinnunni áfram og haft yfirmarkmið okkar að leiðarljósi, en þau eru sótt úr Heimsmarkmiðum Sameinuðu þjóðanna. Má þar nefna að árið 2021 var ráðist í að móta stefnu allra fimm sviða bæjarins; menntasviðs, umhverfissviðs, velferðarsviðs, fjármálasviðs og stjórnsýslusviðs.

Stefnunum fylgja tengdar aðgerðaáætlanir með mælanlegum markmiðum, mælikvörðum og aðgerðum. Fjárhagsáætlunargerð bæjarins tók mið af þeim markmiðum og áherslum sem birtust í stefnum sviðanna og varð þar með fyrsta stefnumiðaða fjárhagsáætlunin sem unnin hefur verið af sveitarfélagi. Haldið verður áfram á þeirri braut í ár.

Við erum stolt af því hjá Kópavogsbæ hversu vel hefur tekist til í þessum efnum en óhætt er að segja að bærinn hafi verið i forystu sveitarfélaga við innleiðingu Heimsmarkmiðanna. Sjálfbærniskýrslan veitir innsýn í þetta stóra verkefni
auk þess að fjalla um starfsemi Kópavogsbæjar í víðara samhengi. Af nógu er að taka enda Kópavogur stórt og öflugt bæjarfélag.

Ármann Kr. Ólafsson, bæjarstjóri í Kópavogi.

Þessi skýrsla er fyrsta sjálfbærniskýrsla Kópavogsbæjar. Skýrslan er gefin út samkvæmt viðmiðum Global Reporting Initiative, GRI Standards: Core en einnig verður leitast við að birta þær mælingar utan CORE sem þegar eru til staðar hjá sveitarfélaginu. GRI tilvísunartaflan sem fylgir skýrslunni skýrir að hve miklu leyti gert er grein fyrir hverju viðmiði í skýrslunni. Sum viðmiðanna fá ítarlega umfjöllun á meðan gert er grein fyrir öðrum í tilvísunartöflunni. Sveitarfélög í Kanada og á Norðurlöndunum voru höfð til hliðsjónar við vinnu skýrslunnar. Horft var til heildarstefnu Kópavogsbæjar og innleiðingar hennar sem felur í sér vinnu með Heimsmarkmið Sameinuðu þjóðanna um sjálfbærni. GRI vísarnir, sem hafa hingað til verið notaðir fyrir fyrirtæki, duga ekki einir og sér til að ná utanum margbreytileika samfélags Kópavogsbæjar með alla sína íbúa, fyrirtæki og stofnanir og þess vegna er einnig að finna í skýrslunni ýmsar aðrar upplýsingar um samfélagið.

Mælingar í skýrslunni eru frá árunum 2018-2021. Kópavogsbær hefur á nokkrum árum safnað saman umfangsmiklum gögnum í upplýsingakerfum sínum um starfsemi sveitarfélagsins. Einnig hafa verið þróuð sérstök upplýsingakerfi til þess að halda utan um mælingar, mælaborð og vísitölur sveitarfélagsins. Vísað verður í þær upplýsingar og er skýrslunni ætlað að gefa innsýn í þau fjölmörgu verkefni sem unnin hafa verið á vegum sveitarfélagsins á undanförnum árum. Þær upplýsingar sem birtast í skýrslunni koma m.a. úr upplýsingakerfum sveitarfélagsins, s.s. Nightingale sem heldur utan um Heimsmarkmiðavísitölu Kópavogsbæjar, umhverfisumsjónarkerfi Klappa, lífskjara- og þjónustustaðlinum ISO37120 og snjallborgastaðlinum ISO37122.

Starfsmenn sviða sveitarfélagsins komu að ritun skýrslunnar og yfirlestri hennar. Helstu tengiliðir vegna upplýsinga er varða skýrsluna og efni hennar eru Pálmi Þór Másson, sviðsstjóri stjórnsýslusviðs, Kristín Egilsdóttir, sviðstjóri fjármálasviðs, Auður Finnbogadóttir, stefnustjóri, Pétur Illugi Einarsson, sérfræðingur hjá Kópavogsbæ, og Jakob Sindri Þórsson, sérfræðingur hjá Kópavogsbæ. Leiðsögn og gæðatrygging skýrslunnar var í höndum Evu Magnúsdóttur, Podium ehf. Endanleg ábyrgð á birtingu skýrslunnar liggur hjá bæjarstjórn Kópavogs.