Grunn­skólar

Öll börn eru skólaskyld á því ári sem þau ná sex ára aldri.

Innritun fyrir komandi skólaár er auglýst í lok febrúar og fer fram fyrstu vikuna í mars í gegnum Ísland.is.

Við innritun þarf að:

• Sækja um frístund fyrir 1.–4. bekk ef við á.
• Skrá barn í mötuneyti.

Nemendur sækja að jafnaði skóla í sínu hverfi, en einnig er hægt að sækja um skólavist í öðrum grunnskólum.

Í sumum tilvikum er hægt að víkja frá hefðbundinni skólagöngu.

Til dæmis getur barn:

• Hafið grunnskóla fyrir sex ára aldur, með heimild skólastjóra og umsögn sérfræðiþjónustu.
• Lokið grunnskóla fyrr en eftir tíu ár.
• Verið einu ári lengur í leikskóla með heimild leikskólanefndar og umsögn viðeigandi fagaðila.

Ákvörðun um slíkt er tekin í samvinnu foreldra og skólastjórnenda viðkomandi skóla.

Foreldrar geta sótt um skólavist í öðru sveitarfélagi.

• Umsókn þarf að berast fyrir 1. apríl.
• Sækja þarf um árlega ef vist varir lengur en eitt ár.

• Skólasetning: 25. ágúst 2025
• Vetrarleyfi: 27.–28. október 2025
• Vetrarleyfi: 19.–20. febrúar 2026

• Skólasetning: 25. ágúst 2026
• Vetrarleyfi: 22.–23. október 2026
• Vetrarleyfi: 22.–23. febrúar 2027

Sérdeildir eru ætlaðar nemendum sem þurfa aukinn stuðning í námi og daglegu skólastarfi. Nemendur eru skráðir í almenna bekki og taka þátt í leik og starfi með öðrum.

Í Kópavogi starfa sérdeildir í eftirfarandi skólum:

• Álfhólsskóli – 1.–10. bekkur, fyrir nemendur með einhverfu og mikla stuðningsþörf.
• Salaskóli – 1.–10. bekkur, fyrir nemendur með einhverfu og mikla stuðningsþörf.
• Kópavogsskóli – 5.–10. bekkur, fyrir nemendur með þroskafrávik og mikla stuðningsþörf.
• Snælandsskóli – 8.–10. bekkur, fyrir nemendur með þroskafrávik og mikla stuðningsþörf.

Ef ekki er hægt að mæta þörfum barns í almennum grunnskóla geta foreldrar sótt um skólavist í sérskóla.

Hægt er að sækja um í:

• Klettaskóla
• Brúarskóla
• Arnarskóla

Sjá nánari upplýsingar um skólana á heimasíðum þeirra.

Foreldrar grunnskólabarna sem uppfylla skilyrði samkvæmt reglum um akstursþjónustu fatlaðra geta sótt um akstur fyrir börn sín að 16 ára aldri.

Akstur getur meðal annars verið:

• Til og frá skóla.
• Í tómstundaúrræði utan skóla.
• Í tal-, sjúkra- og iðjuþjálfun á skólatíma.
• Á námskeið yfir sumarið.

Virknikorti er ætlað að leiðbeina foreldrum og börnum þeirra í samræðum um æskileg viðmið varðandi félagslega virkni og heilbrigt líferni.

Kortið er í rafrænu formi.

Á kortinu eru stuttar leiðbeiningar ásamt virkum tenglum sem vísa á hagnýtt efni á heilsuvera.is til stuðnings einstökum efnisatriðum.

Til að vinna með virknikortið í spjaldtölvu notið Books smáforritið.

Í Kópavogi eru námsgögn afhent nemendum að kostnaðarlausu, þar á meðal spjaldtölva.

Á fyrstu skólaárunum deila 1–2 jafnaldrar sömu spjaldtölvu. Frá 4. til 10. bekk fær hvert barn eigin spjaldtölvu til afnota og frá 5. bekk taka nemendur spjaldtölvuna og hleðslutæki með sér heim.

Skólataska þarf að rúma íþróttafatnað, hollt og gott nesti og aukafatnað ef þarf.

Mikilvægt er að hjálpa barninu að velja alltaf öruggustu leiðina í skólann. Foreldrar eru hvattir til að kynna skólalóðina fyrir börnum sínum utan skólatíma áður en grunnskólaganga hefst.

Kynnið ykkur vel lög og reglur sem gilda um hjólreiðar, rafhlaupahjól og önnur rafknúin farartæki, sem og reglur sem gilda í skóla barnsins.

Mikilvægt er fyrir foreldra grunnskólabarna að mæta á foreldrafundi og vera í góðu sambandi við umsjónarkennara barnsins. Gagnkvæmur skilningur og stuðningur um velferð barnsins er sameiginlegt markmið heimilis og skóla.

Kynntu þér rafrænt aðgengi að upplýsingum frá skólanum og kennurum barnsins.

Lestrarþjálfun fer að mestu fram heima og er mikilvægt að styðja barnið í þeirri vegferð sem og í öðru námi sem lagt er fyrir það. Mikilvægt er fyrir foreldra að kynna sér vel hvernig best er að styðja við barnið sitt í náminu.

Í Kópavogi eru margir íbúar með fjölbreyttan tungumála- og menningarlegan bakgrunn. Stefnt er að góðu fjölmenningarlegu skóla- og frístundastarfi í öllum grunnskólum bæjarins. Í því starfi er haft að leiðarljósi að öll börn og ungmenni nái árangri í námi og leik, standi vel að vígi félagslega og fái tækifæri til að vera stolt af bakgrunni sínum og menningu.

Gefinn hefur verið út bæklingur á íslensku, ensku og pólsku með helstu upplýsingum um skóla- og frístundastarf fyrir þau sem eru nýflutt til landsins.

Foreldrar geta leitað til kennsluráðgjafa á menntasviði fyrir frekari upplýsingar.

Foreldrarölt myndar tengsl og stuðlar að auknu samtali milli foreldra í hverfinu. Með því að taka þátt í foreldrarölti kynnast foreldrar hverfinu og öðrum foreldrum á annan hátt. Foreldrarölt getur líka haft uppbyggileg og jákvæð áhrif á það félagslega umhverfi sem börn hverfisins búa í.

Tilgangur foreldrarölts er meðal annars að kanna hvar unglingahópar halda sig eftir að leyfður útivistartími er liðinn, kanna hvernig ástandið er á þeim og hvað þeir eru að gera.

Handbók um foreldrarölt.