Um er að ræða um 1.699 m2 verslunar- og þjónustulóð. Lóðin er á skilgreindu verslunar- og þjónustusvæði (VÞ22) skv. Aðalskipulagi Kópavogs 2019-2040. Lóðin er jafnframt staðsett á samgöngumiðuðu svæði. Sérstök áhersla er lögð á gott aðgengi fyrir hjólandi og gangandi að verslunum og þjónustu á svæðinu.

Verslunar- og þjónustulóð við Dalveg 1

Gert er ráð fyrir að starfsemi Sorpu flytjist af lóðinni haustið 2025 og lóðinni skipt upp, annars vegar í opið svæði á vestari hluta lóðarinnar og hins vegar verslunar og þjónustusvæði á austari hluta lóðarinnar. Kópavogsbær óskar eftir hugmyndum að nýtingu lóðarinnar fyrir skilgreinda notkun verslunar- og þjónustu samkvæmt gildandi aðalskipulagi sem og ásýnd Kópavogsdalsins. Samkvæmt heildarsýn fyrir Kópavogsdalinn, dags. 12. apríl 2024, er gert ráð fyrir austurinngangi í Kópavogsdalinn á lóðinni en jafnframt eru í skýrslunni nefndir möguleikar á „fjölnotahúsi“ með fjölbreyttum nýtingarmöguleikum, sem tengir lóðina vel við náttúru og útivist í dalnum. Þá er lögð áhersla á ásýnd bygginga? þar sem efnisvalið gæti t.d. verið blanda af grjóti, timbri, gleri og torfi. Aðilar eru hvattir til að koma með tillögur sem samrýmast þessum áherslum. Vakin er athygli á að til greina kemur að starfsemi taki til allrar lóðarinnar en ekki aðeins svæðisins sem afmarkað er fyrir verslun og þjónustu í gildandi aðalskipulagi. Aðilar eru hvattir til að skoða gildandi aðalskipulag Kópavogs, heildarsýn fyrir Kópavogsdal, dags. 12. apríl 2024, og lóðarmörk og aðstæður á kortasjá Kópavogsbæjar við vinnslu á tillögum.

Aðilar skulu skila inn upplýsingum um fyrirhugaða starfsemi á lóðinni, áætlað byggingarmagn, fyrirhugaða staðsetningu byggingarreita, áætlun um fjármögnun lóðar og tilboð í verð á hvern fermetra byggingarréttar. Aðilar þurfa að uppfylla þau skilyrði sem gert er til umsókna lögaðila við úthlutun lóða, sbr. 7. gr. reglna um úthlutun lóða í Kópavogsbæ, samþykktar 13. febrúar 2023.

Þeim aðilum sem eiga þá hugmynd sem valin er til áframhaldandi samstarfs verður boðið til viðræðna um lóðarvilyrði til tveggja ára. Innan þess tímaramma skal lóðarvilyrðishafi vinna að tillögu að nýju deiliskipulagi fyrir lóðina í takt við sínar hugmyndir sem og hugmyndir Kópavogsbæjar sem settar voru fram í Heildarsýn fyrir Kópavogsdal, dagsett 12. apríl 2024.

Greitt er fyrir lóðarvilyrðið árlega sem miðast við 10% af heildargreiðslu byggingarréttarins. Sú fjárhæð fæst ekki endurgreidd ef ekki verður af áframhaldandi skipulagsvinnu innan skilgreinds tímaramma.

Kópavogsbær áskilur sér rétt til að ákveða hvort hugmyndir sem berast verði kveikja að samstarfi eða samningum um lóðina og þá um leið að þær verði hluti af forsendum fyrirhugaðs skipulags. Kópavogsbær áskilur sér rétt til samþykkja hvaða hugmynd sem er eða hafna öllum.

Áhugasöm sendi inn erindi þar sem þau lýsa því nánar hvaða starfsemi væri fyrirhuguð á reitnum, æskilegt byggingarmagn yrði, áætlun um fjármögnun lóðar og tilboðsverð á hvern fermetra. Erindin skal senda á netfangið skipulag@kopavogur.is merkt “Dalvegur 1”.

Frestur til þess að skila inn hugmyndum er til kl. 16:00 mánudaginn 30. júní 2025.