Staðan núna

15. apríl 2026

Staða framkvæmda á Fannborgarreit

Unnið er að flokkun niðurrifs á húsum við Fannborg 4 og 6 sem þegar hafa verið rifin að mestu, auk undirbúnings tímabundinna bílastæða. Vinnan hefur tekið lengri tíma en áætlað var vegna plássleysis, en gert er ráð fyrir að henni ljúki í lok vikunnar eða byrjun næstu viku.

 

1. apríl 2026
Bílastæði og niðurrif

Unnið er að frágangi bílastæða á svæðinu.

  • Verkið hefur tekið lengri tíma en upphaflega var áætlað, en stefnt er að því að ljúka frágangi fyrir páska.
  • Jafnframt stendur yfir niðurrif á húsi nr. 6. Gert er ráð fyrir að meginhluta niðurrifsins verði lokið fyrir páska.
  • Til að bæta aðgengi verður eyja fjarlægð og fleiri bílastæði opnuð neðar á svæðinu
18. mars 2026

Niðurrifi á Fannborg 2 lokið og næstu skref

Framkvæmdir í miðbæ Kópavogs halda áfram. Hér að neðan er upptalning á því sem hefur gerst undanfarið og því sem er á dagskrá.

 
  • Búið er að rífa húsið að Fannborg 2. Nú er verið að mylja sökkla og flokka úrgangsefni.
  • Að lokinni flokkun og brottakstri efnis verður fyllt upp í grunninn fyrir bílastæði, eins og gert er ráð fyrir í framkvæmdafasa 2. Gert er ráð fyrir að það bílastæði verði tilbúið í næstu viku.
  • Verið er að opna stæðaröð á efra bílastæðinu, eins og sjá má á meðfylgjandi teikningu. Gert er ráð fyrir að það klárist fyrir lok dagsins í dag, miðvikudaginn 18. mars 2026.
  • Einnig verður lokunarsvæðið á neðra plani minnkað og fleiri bílastæði opnuð þar.
  • Til að minnka rykdreifingu hefur verktaki notast við háþrýstivatnsúðara sem mynda mistur yfir brotsvæði og takmarkar ryk sem annars færi yfir nálæg hús og bifreiðar.
  • Búið er að sækja um niðurrifsleyfi fyrir Fannborg 4 og 6 og má búast við að þau leyfi verði gefin út í næstu viku. Þegar leyfin eru komin verður ráðist í niðurrif á þeim húsum.
  • Öll viðbótarstæði eiga að vera tilbúin í næstu viku.

Framkvæmdasvæðið - Sjá má bílastæðin á þessari teikningu. Framkvæmdasvæðið er innan rauðu línunnar.

Blásarar: Á þessum þremur myndum má sjá háþrýstivatnsúðara sem blása mistri yfir brotsvæðið og takmarka þannig ryk sem annars hefði fallið á nálæg hús og bifreiðar. Þannig takmarkar verktakinn óþægindi fyrir nágranna framkvæmdasvæðisins.

 

23. febrúar 2026
Kæru vísað frá

Í byrjun febrúar lagði húsfélag Hamraborgar 10 fram kæru til úrskurðarnefndar umhverfis- og auðlindamála, þar sem kærð var ákvörðun byggingarfulltrúa Kópavogsbæjar frá 30. janúar 2026 um að samþykkja umsókn um byggingarleyfi fyrir niðurrifi mannvirkis á lóð Fannborgar 2.

Á fundi nefndarinnar síðastliðinn föstudag, 20. febrúar 2026, var kærunni vísað frá með úrskurði.

Lesa má úrskurðinn hér: UUA2602010 Fannborg - Úrskurðarnefnd umhverfis- og auðlindamála

4. febrúar 2026

Fannborgarreitur

Nú er 0. fasa að ljúka og 1. fasi hafinn. Fasi 1 felur í sér niðurrif húsasanna við Fannborg 2, 4, og 6. Þriðjudaginn 3. febrúar gaf byggingarfulltrúi Kópavogs út leyfi til niðurrifs á Fannborg 2 og er niðurrif á því húsið hafið. Upplýsingafundur um niðurrifið á Fannborgarreitnum var haldinn þann 28. janúar 2026, og sjá má þann fund hér á síðunni undir "Upplýsingafundir".

4. febrúar 2026
Traðreitur vestur

Á næstu dögum mun Jáverk ehf. gera prufuholur á nokkrum stöðum á Traðarreit vestri. Verið er að undirbúa verkið og munu tæki til þess koma inn á svæðið frá Vallartröð.

Myndin sýnir hvar prufuholurnar verða gerðar.

29. janúar 2026
Upplýsingafundir

Síðasti upplýsingafundur fyrir íbúa og fyrirtæki á Fannborgarreit var 28. janúar 2026, kl. 16:30 í Safnaðarheimilinu Borgum að Hábraut 1a í Kópavogi og var fundinum jafnframt streymt. Sjá má fundinn undir flipanum "Upplýsingafundir".

28. janúar 2026
Hreinsun úr húsum og ástandsskoðun (0. fasi)

Núllti (0.) fasi fólst í hreinsun og ástandsskoðun. Hreinsun er að ljúka úr húsum í Fannborg 2, 4 og 6. Ástandsskoðanir vegna framkvæmdanna eru í fullum gangi og er áætlað að þær standi fram í febrúar 2026. Verkfræðistofan VSÓ sér um ástandsskoðanirnar, og hefur samband við íbúa og húsfélög til að finna hentugar dagsetningar fyrir skoðanir. Tímasetningar eru ákveðnar í nánu samráði við íbúa. Haft hefur verið samband við formenn húsfélaganna og þeim falið að miðla upplýsingum áfram til íbúa. Í minni húsum var haft beint samband við íbúana sjálfa. Íbúar þurfa að vera viðstaddir þegar ástandsskoðun fer fram. Allar upplýsingar sem þar koma fram eru meðhöndlaðar sem trúnaðargögn.

Bent er á upplýsingafund sem haldinn var 18. nóvember 2025, þar sem farið var yfir stöðu mála.

17. janúar 2026
Óleyfisaðgerð stöðvuð af byggingarfulltrúa

Þann 16. janúar 2026, áður en leyfi var gefið út fyrir niðurrifi utanhúss, réðst Árkór ehf. í afmarkað niðurrif á þakskyggni utan á Fannborg 2 til að koma sorpgámi sem næst húsinu. Þetta var gert til að losa efni úr efri hæðum hússins beint í gám, og auðvelda þar með efnisflutninga og stytta heildartíma verksins. Niðurrifið var þó stöðvað af byggingafulltrúa samdægurs þar sem tilskilin leyfi til niðurrifs höfðu ekki verið veitt. Forsvarsmenn Árkórs ehf. sendu frá sér yfirlýsingu í kjölfar umfjöllunar í fjölmiðlum þar sem segir að ekki hafi staðið til að rífa Fannborg 2 án leyfis. Engin vinna var hafin við niðurrif á húsinu enda höfðu tilskilin leyfi til þess ekki verið veitt. Húsið er í eigu fyrirtækisins og stendur til að íbúðarhús verði byggð á þessari lóð. Árkór baðst velvirðingar á þessu frumhlaupi og farið var yfir verklag og samskipti við verktaka til að tryggja að slíkt gerist ekki aftur.

Nú hefur niðurrifsleyfið verið gefið út og má þá hefjast handa við að rífa húsið.
 

 

Myndin sýnir til vinstri Fannborg 2 þar sem búið er að rífa part úr þakskyggni byggingarinnar. Á myndinni eru girðingar sem afmarka svæðið og innan þeirra er rauð grafa sem stendur við Fannborg 2

Myndin sýnir til vinstri Fannborg 2 þar sem búið var að rífa part úr þakskyggni byggingarinnar. Á myndinni eru girðingar sem afmarka svæðið og innan þeirra er rauð grafa sem stendur við Fannborg 2