Miðbær í mótun

Upplýsingasíða um fyrirhugaðar framkvæmdir í miðbæ Kópavogs í Fannborg og við Vallartröð.

Uppbygging reitanna er hluti af framtíðarþróun miðbæjar Kópavogs með það að markmiði að svæðið styrkist sem mannlífs- og menningarmiðja sem þjóni mikilvægu hlutverki fyrir Kópavogsbúa. Deiliskipulag svæðisins tók gildi árið 2021 en drög að byggingaráformum voru staðfest í bæjarstjórn í maí 2025.

Ábendingar og fyrirspurnir berist á midbaer(hjá)kopavogur.is

Hér getur þú:

Kynnt þér allt sem viðkemur miðbæ í mótun
Kynnt þér skipulagsferlið
Fengið upplýsingar um framkvæmdir á framkvæmdatíma
Horft á streymi af upplýsingafundum

Nýjasti upplýsingafundurinn var haldinn 28. janúar. Passið að samþykkja kökur á síðunni til að myndbandið birtist.

Staðan núna

Fannborgarreitur

Nú er 0. fasa að ljúka og 1. fasi hafinn. Fasi 1 felur í sér niðurrif húsasanna við Fannborg 2, 4, og 6. Þriðjudaginn 3. febrúar gaf byggingarfulltrúi Kópavogs út leyfi til niðurrifs á Fannborg 2 og er niðurrif á því húsið hafið. Upplýsingafundur um niðurrifið á Fannborgarreitnum var haldinn þann 28. janúar 2026, og sjá má þann fund hér á síðunni undir "Upplýsingafundir".

Traðreitur vestur
Á næstu dögum mun Jáverk ehf. gera prufuholur á nokkrum stöðum á Traðarreit vestri. Verið er að undirbúa verkið og munu tæki til þess koma inn á svæðið frá Vallartröð.

Myndin sýnir hvar prufuholurnar verða gerðar.

Upplýsingafundir

Síðasti upplýsingafundur fyrir íbúa og fyrirtæki á Fannborgarreit var 28. janúar 2026, kl. 16:30 í Safnaðarheimilinu Borgum að Hábraut 1a í Kópavogi og var fundinum jafnframt streymt. Sjá má fundinn undir flipanum "Upplýsingafundir".

Glærur frá fundinum

Hreinsun úr húsum og ástandsskoðun (0. fasi)

Núllti (0.) fasi fólst í hreinsun og ástandsskoðun. Hreinsun er að ljúka úr húsum í Fannborg 2, 4 og 6. Ástandsskoðanir vegna framkvæmdanna eru í fullum gangi og er áætlað að þær standi fram í febrúar 2026. Verkfræðistofan VSÓ sér um ástandsskoðanirnar, og hefur samband við íbúa og húsfélög til að finna hentugar dagsetningar fyrir skoðanir. Tímasetningar eru ákveðnar í nánu samráði við íbúa. Haft hefur verið samband við formenn húsfélaganna og þeim falið að miðla upplýsingum áfram til íbúa. Í minni húsum var haft beint samband við íbúana sjálfa. Íbúar þurfa að vera viðstaddir þegar ástandsskoðun fer fram. Allar upplýsingar sem þar koma fram eru meðhöndlaðar sem trúnaðargögn.

Bent er á upplýsingafund sem haldinn var 18. nóvember 2025, þar sem farið var yfir stöðu mála.

Óleyfisaðgerð stöðvuð af byggingarfulltrúa

Þann 16. janúar 2026, áður en leyfi var gefið út fyrir niðurrifi utanhúss, réðst Árkór ehf. í afmarkað niðurrif á þakskyggni utan á Fannborg 2 til að koma sorpgámi sem næst húsinu. Þetta var gert til að losa efni úr efri hæðum hússins beint í gám, og auðvelda þar með efnisflutninga og stytta heildartíma verksins. Niðurrifið var þó stöðvað af byggingafulltrúa samdægurs þar sem tilskilin leyfi til niðurrifs höfðu ekki verið veitt. Forsvarsmenn Árkórs ehf. sendu frá sér yfirlýsingu í kjölfar umfjöllunar í fjölmiðlum þar sem segir að ekki hafi staðið til að rífa Fannborg 2 án leyfis. Engin vinna var hafin við niðurrif á húsinu enda höfðu tilskilin leyfi til þess ekki verið veitt. Húsið er í eigu fyrirtækisins og stendur til að íbúðarhús verði byggð á þessari lóð. Árkór baðst velvirðingar á þessu frumhlaupi og farið var yfir verklag og samskipti við verktaka til að tryggja að slíkt gerist ekki aftur.

Nú hefur niðurrifsleyfið verið gefið út og má þá hefjast handa við að rífa húsið.

Myndin sýnir til vinstri Fannborg 2 þar sem búið var að rífa part úr þakskyggni byggingarinnar. Á myndinni eru girðingar sem afmarka svæðið og innan þeirra er rauð grafa sem stendur við Fannborg 2