Bæjarráð

Fundarhlé hófst kl. 8:26, fundi fram haldið kl. 9:43

Tillaga frá fulltrúum minnihluta um frestun erindisins er hafnað með þremur atkvæðum gegn atkvæðum Theódóru S. Þorsteinsdóttur og Thelmu B. Árnadóttur.

Bæjarráð samþykkir með þrem atkvæðum, gegn atkvæðum Theódóru S. Þorsteinsdóttur og Thelmu B. Árnadóttur uppfært samkomulag um uppbyggingu á skipulagssvæðinu Fannborgarreitur (B1-1).


Bókun:
"Undirrituð telja að undirritun þessa uppbyggingarsamkomulags sé ótímabært enda margt óljóst í samkomulaginu til að mynda 25 metra reglan um aðgengi hreyfihamlaðra rétt eins kemur fram í fundargerð Notendaráðs í málefnum fatlaðs fólks frá 19. júní 2025.

Undirrituð harma að íbúar hafi ekki fengið að koma fyrr að ferlinu og leggjum enn og aftur til að settur verði á laggirnar „samráðsvettvangur“ eða nokkurs konar „miðbæjarráð“ sem vinna mun samhliða framkvæmdunum ef og þegar þær hefjast. Þar munu eiga sæti fulltrúar frá Kópavogsbæ, lóðarrétthafa, íbúar úr Fannborg og Hamraborg auk sérfræðinga sem myndu hafa verkstjórn í ferlinu.

Undirrituð óska eftir frestun á afgreiðslu erindisins."

Indriði I. Stefánsson
Thelma B. Árnadóttir
Hákon Gunnarsson
Theódóra S. Þorsteinsdóttir


Bókun:
"Undirritaður bendir á tilgangsleysi þess að hafa forgangsrétt að íbúðum á markaðsvirði fyrir félagsþjónustuna. Eðlilegra væri að fá forkaupsrétt að íbúðum á kostnaðarverði, eigi að kaupa íbúðir á markaðsvirði mætti bara kaupa íbúðirnar, enda varla tilgangurinn að fá ákveðnar íbúðir frekar en aðrar. Það verður að telja ólíklegt að bærinn nýti sér þetta þar sem kostnaðurinn verði of mikill og slík ákvæði sjaldan nýtt þegar um nýjar dýrar íbúðir er að ræða."

Indriði I. Stefánsson.


Bókun:
"Ekkert samtal hefur farið fram við íbúa í Fannborg 3-9 sem þegar hafa greitt fyrir 36 bílastæði ári sbr staðfestingu Endurskoðunar hf frá 30 nóvember 1981. Þau eru tekin af þeim einhliða af aðilum samkomulagsins.

Þarna er meðalhófsreglan þverbrotin eins og víða í þessu ferli."

Hákon Gunnarsson


Bókun:
"Uppbyggingarsamkomulagið er uppfærsla á gildandi samkomulagi, er bæði skýrara og ítarlegra og til hagsbóta fyrir Kópavogsbæ og íbúa.

Meirihlutinn hafnar því að undirritun uppbyggingarsamkomulagsins sé ótímabær. Samkomulagið byggir á vönduðu ferli sem staðfest hefur verið á fjölmörgum stigum skipulags- og stjórnsýsluferlisins. Ljóst er að mikil þörf er á að endurnýja og þróa miðbæ Kópavogs og skapa þar vistvænt, lifandi og aðlaðandi umhverfi með blöndu íbúða og þjónustu.

Í uppbyggingarsamkomulaginu er meðal annars tiltekið að samskiptavettvangur fyrir íbúa verði með tengiliði frá Kópavogsbæ og uppbyggingaraðila. Upplýsingafundur hefur verið haldinn með íbúum og verða haldnir áfram fyrir hvern fasa á framkvæmdatíma.

Varðandi aðgengismál hreyfihamlaðra tekur meirihlutinn þá gagnrýni alvarlega. Skýrt hefur komið fram að byggingarleyfi verða ekki veitt nema fyrir liggi fullnægjandi og lögbundnar lausnir sem tryggja aðgengi allra, þar með talið þeirra sem reiða sig á stuttar leiðir frá bílastæðum að inngöngum. Meirihlutinn leggur áherslu á að allar framkvæmdir taki mið af byggingarreglugerð og þeim kröfum sem þar eru gerðar."

Svava H. Friðgeirsdóttir
Andri S. Hilmarsson
Elísabet B. Sveinsdóttir
Ásdís Kristjánsdóttir


Bókun:
"Meirihluti Sjálfstæðisflokks og Framsóknar hafa ekki veitt neinar upplýsingar til íbúa síðustu sjö ár og alls ekkert samráð átt sér stað. Það er ekki til meiri upplýsingaóreiða en að veita engar upplýsingar.
Það er enginn ágreiningur um mikilvægi uppbyggingar í miðbæ Kópavogs heldur mikilvægi þess að íbúar fái aðkomu að ákvarðanatöku sem og upplýsingar um þær ákvarðanir sem teknar eru.
Nýta hefði mátt síðustu sjö ár mun betur við heildaruppbyggingu í miðbænum."

Indriði I. Stefánsson
Thelma B. Árnadóttir
Hákon Gunnarsson
Theódóra S. Þorsteinsdóttir


Bókun:
"Í skipulagsferlinu sjálfu sem lauk árslok 2021 var samráð haft við íbúa langt umfram það sem skipulagslög gera ráð fyrir. Skipulagsvinnan tók mið af lögbundnu ferli með opnum kynningum, samráði við íbúa og ítrekað verið fjallað um uppbygginguna á fundum bæjarstjórnar, skipulagsráðs og í fjölmiðlum. Það er því alrangt sem minnihlutinn heldur fram að ekkert samráð hafi átt sér stað sl. sjö ár!

Uppbygging miðbæjarins er mikilvægt hagsmunamál fyrir alla bæjarbúa og einmitt þess vegna hefur verið unnið að verkefninu af fagmennsku, þó ekki sé alltaf samstaða um allar útfærslur. Meirihlutinn tekur undir að gagnsæi og samtal skipti miklu enda er sérstaklega fjallað um útfærslu á því í uppbyggingarsamkomulaginu til þess að tryggja að það takist sem best."

Svava H. Friðgeirsdóttir
Andri S. Hilmarsson
Elísabet B. Sveinsdóttir
Ásdís Kristjánsdóttir

Lagt fram.

Bæjarráð samþykkir með fimm atkvæðum framlagt erindisbréf menntaráðs.

Bæjarráð samþykkir með þremur atkvæðum gegn atkvæðum Theódóru S. Þorsteinsdóttir og Thelmu B. Árnadóttur framlagt erindisbréf leiksskólanefndar.

Bæjarráð samþykkir með þremur atkvæðum og hjásetu Theódóru S. Þorsteinsdóttur og Thelmu B. Árnadóttur umbeðna heimild á veðsetningu lóðarinnar Háahvarfi 2.

Bæjarráð samþykkir með þremur atkvæðum og hjásetu Theódóru S. Þorsteinsdóttur og Thelmu B. Árnadóttur beiðni lóðarhafa Hlíðarhvarfs 1 um heimild til veðsetningar lóðarinnar.

Bæjarráð samþykkir með þremur atkvæðum og hjásetu Theódóru S. Þorsteinsdóttur og Thelmu B. Árnadóttur framlagða tillögu að úthlutun í raðhúsalóðir við göturnar Stöðvarhvarf, Sólarhvarf, Skýjahvarf og Skyggnishvarf í Vatnsendahvarfi.

Bæjarráð samþykkir með þremur atkvæðum og hjásetu Theódóru S. Þorsteinsdóttur og Thelmu B. Árnadóttur framlagða tillögu að úthlutun fjölbýlishúsalóða við göturnar Stöðvarhvarf og Skólahvarf í Vatnsendahvarfi.

Erindinu vísað til skipulags- og umhverfisráðs.

Lagt fram.

Lagt fram.

Lagt fram.

Lagt fram.

Lagt fram.

Lagt fram.

Lagt fram.

Lagt fram.

Umræður.

Bæjarráð vísar málinu til umsagnar sviðsstjóra umhverfissviðs.