Símafrí í skóla- og frístundastarfi

Sáttmáli um símafrí í skóla- og frístundastarfi í Kópvogi hefur verið samþykktur að undangengnu samráði við nemendur, foreldra og fagfólk í grunnskólum í Kópavogi.

Í sáttmálanum felst meðal annars að símar eru ekki sýnilegir í skóla- og frístundastarfi og frímínútur verða skjálausar.

Markmið sáttmálans er að skapa öruggt og félagslega sterkt skóla- og frístundaumhverfi þar sem nemendur fá tækifæri til þess að einbeita sér að námi, samskiptum og vellíðan.

Sækið sáttmálann

Sáttmálinn er sameiginleg yfirlýsing skólasamfélags Kópavogs og byggir á trausti, samvinnu og ábyrgð í símanotkun. Nemendur, foreldrar, starfsfólk og stjórnendur sammælast um símafrí með það að markmiði að skapa námsfrið, vellíðan og jákvætt félagslegt umhverfi. Samhliða er stuðlað að jafnræði og samræmi á milli skóla og dregið úr neikvæðum áhrifum skjánotkunar.

Nemendur í 1. - 7. bekk geyma síma og símaúr heima eða á hljóðri stillingu í tösku.
Nemendur í 8. - 10. bekk geyma síma og símaúr á hljóðri stillingu þar sem hann truflar þá ekki.
Frímínútur eru skjálausar.
Fullorðnir eru fyrirmyndir.
Við lærum saman um ábyrga skjánotkun.
Við stöndum saman um símafrí í skóla- og frístundastarfi.

Geymsla síma og símaúra

Nemendur í 1. – 7.bekk geyma síma og símaúr heima eða á hljóðlausri stillingu í skólatösku á skóla- og frístundatíma.
Nemendur í 8. – 10. bekk bera aukna ábyrgð á eigin símanotkun og tryggja að sími eða símaúr trufli hvorki þá sjálfa né aðra. Síminn er geymdur á hljóðlausri stillingu í skólatösku, eða þar sem hann truflar nemendur ekki í daglegu skólastarfi.

Frímínútur eru skjálausar og ætlaðar til uppbyggingar félagslegra tengsla í gegnum leik, hreyfingu, samtal og samveru.

Ef neyðartilvik koma upp sjá fullorðnir í skólanum um samskipti og aðgerðir samkvæmt viðbragðsáætlun skólans. Nemendur treysta á skólann við slíkar aðstæður.

Hvenær getur persónulegur sími nemanda verið notaður á skólatíma?

Þegar nemandi fær skýrt leyfi starfsfólks til að nota símann.Slíkar undantekningar eiga að vera sjaldgæfar.

Dæmi um hvenær þarf ekki að nota persónulegan síma á skólatíma?

Þegar nemandi gleymir nesti, íþróttafötum eða námsgögnum heima.
Þegar leysa þarf almenn skipulagsmál (dæmi: æfingar, leikstundir, skilaboð til vina).
Þörf fyrir að skoða samskipti á netinu.

Nemendur leita til starfsfólks þegar þeir þurfa stuðning og úrlausn sinna mála.

Fullorðnir sem fyrirmynd

Starfsfólk og foreldrar eru fyrirmyndir í skólasamfélaginu. Mælst er til að fullorðnir noti ekki persónulega síma eða símaúr í augsýn nemenda í skólanum nema nauðsyn beri til.

Þess má geta að nemendur, starfsfólk skóla og foreldrar taka virkan þátt í að meta hvernig gengur og fá tækifæri til að koma að endurskoðun sáttmálans þegar reynsla hefur skapast.

Ítarlegri leiðbeiningar er að finna í sáttmálanum sjálfum.