Kópavogsbær

Vegna fjölda áskoranna munu Bjarni Snæbjörns og Sigga Eyrún snúa aftur í Salinn með tónleikaröðina SÖNGLEIKJASTÆLA. Tónleikaröðin sló í gegn í fyrra og er óður til söngleikjanna þar sem ný og gömul söngleikjatónlist fær að njóta sín í meðförum reyndra söng-leikara ásamt hljómsveit. Að þessu sinni verða þrennir tónleikar sem teygja sig yfir allan veturinn þar sem hverjir tónleikar eru með ólíka nálgun á formið.  2. nóvember: Nýstirnið Salka Gústafsdóttir og þjóðargersemin Jóhann Sigurðarson koma sem gestasöngvarar og flytja sín uppáhalds söngleikjalög.7. febrúar: Sprúðlandi fjölskyldutónleikar um miðjan dag þar sem börn á öllum aldri fá að syngja með.25. apríl: Sprengju-tónleikar með Söngleikjakórnum Viðlag.  SMELLTU HÉR TIL AÐ KAUPA ÁSKRIFT Á ALLA ÞRJÁ TÓNLEIKANA Á EINSTÖKU TILBOÐI Sigga Eyrún og Bjarni Snæbjörnsson eru ástríðufullir söng-leikarar. Samstarf þeirra hófst á Reykjavík Pride árið 2008 með söngleikjaparinu Viggó og Víólettu. Síðan þá hafa þau lagt hjarta og sál í söngleikjaformið og skemmt landanum á sviðum leikhúsanna, á árshátíðum, í afmælum og víðar. Meðal söngleikja sem þau hafa tekið þátt í eru: Vesalingarnir, Mary Poppins, Kardemommubærinn, Sem á himni, Slá í gegn, Ronja Ræningjadóttir, Jesus Christ Superstar, Frost og Góðan daginn, faggi.  Hljómsveitin er sem fyrr skipuð okkar fremsta tónlistarfólki: Karl Olgeirsson: hljómsveitarstjóri spilar á píanó, hljómborð, harmonikku o.fl.Svanhildur Lóa Bergsveinsdóttir á trommur/slagverkAndri Ólafsson á bassa

Skiptimarkaður jólasveinsins er nú opinn á 2. hæð aðalsafns. Jólasveinarnir vilja ýta undir hringrásarhagkerfið og hafa því fengið aðsetur hjá okkur fyrir dótaskiptimarkað. Þar má bæði skilja eftir og/eða taka dót, án allra kvaða. Skiptimarkaðurinn verður opinn frá 1. til 23. desember.

Nýtt á aðalsafni, jólafataskiptimarkaður á 1. hæð þar sem þú gætir fundið spariföt fyrir alla fjölskylduna. Ýtum undir hringrásarhagkerfið og skiptumst á sparifötum! Á skiptimarkaðinum má bæði skilja eftir og/eða taka spariföt, án allra kvaða. Tökum við hreinum og fínum fötum í öllum stærðum. Skiptimarkaðurinn verður opinn frá 1. til 23. desember.

Hannyrðaklúbburinn Kaðlín hittist alla miðvikudaga á 2. hæð aðalsafns. Heitt á könnunni og öll velkomin! Nánari upplýsingar veitir Gréta Björg Ólafsdóttir, gretabjorg@kopavogur.is Fylgist með í Facebook-hópnum Hannyrðaklúbburinn Kaðlín | Bókasafn Kópavogs.

Jazzkonur koma saman á sínum árlegu jólatónleikum í Salnum miðvikudaginn 17.desember! Á tónleikunum flytja þessar mögnuðu söngkonur öll sín uppáhalds jólalög ásamt jazztríói Vignis Þórs Stefánssonar. Sérstakur gestur þeirra í ár engin annar en stórleikarinn Gói Karlsson.  Tónleikarnir hefjast kl.20:00 og eru um 2 klst með hléi. Jazzkonur: Rebekka Blöndal Silva Þórðar  Kristjana Stefáns Gulla Ólafs Sigrún Erla Gestasöngvari: Gói Karlsson Jazztríó Vignis Þórs Stefánssonar: Vignir Þór Stefánsson píanó Þorgrímur Jónsson kontrabassi Magnús Trygvason Elíassen trommur

Nemendur Tónlistarskóla Kópavogs spila ljúfa jólatónlist fyrir gesti og gangandi á 1. hæð aðalsafns dagana 3. desember, 10. desember og 17. desember kl. 16:00. Piparkökur og hugguleg stemning. Öll velkomin!

Felix les upp úr bókinni sinni Drottningin af Galapagos. Bækurnar eru ætlaðar krökkum 6-12 ára sem elska spennandi ævintýri og eru tilvaldar til lesturs fyrir þau sem eru farin að geta lesið sjálf. Sögurnar um Freyju og Frikka fjalla um skemmtilega 11 ára tvíbura sem ferðast með foreldrum sínum á óvenjulega staði og lenda jafnan í háskalegum ævintýrum. Í fyrstu sögunni liggur leiðin alla leið til Galapagos til að sigla á milli eldfjallaeyja á Drottningunni af Galapagos. Fljótlega kemur í ljós að einhver farþeganna er með óhreint mjöl í pokahorninu og glæpur gegn stórkostlegu en viðkvæmu dýralífi eyjanna er í uppsiglingunni. Enginn trúir börnunum og því þurfa þau að taka til sinna ráða.  Verið hjartanlega velkomin í notalega jólastund á Bókasafni Kópavogs með Felix Bergssyni. Sjáumst á bókasafninu.

Þann 18.desember klukkan 12:15 munu söngnemendur úr Tónlistarskóla FÍH, Ástrún Friðbjörnsdóttir, Birgitta Sveinsdóttir og Steinunn Jónsdóttir bjóða upp á ljúfa hádegistónleika með jólalegu ívafi á Bókasafni Kópavogs. Um undirleik sér Aðalheiður Þorsteinsdóttir. Á tónleikunum verða flutt bæði íslensk og erlend jólalög sem ættu að koma gestum í hátíðarskap. Þriðja árið í röð bjóða framhaldsnemendur af söngdeild Tónlistarskóla FÍH til ljúfra hádegistónleika á Bókasafni Kópavogs. Tónleikarnir fara fram síðasta fimmtudag hvers mánaðar en þar stíga tónlistarstjörnur framtíðarinnar á stokk með spennandi blöndu af gömlu og nýju, lög sem öll þekkja í bland við sjaldheyrðari smelli. Tónleikarnir standa yfir í um hálfa klukkustund og eru öllum opnir á meðan húsrúm leyfir. Aðgangur ókeypis.   Aðalheiður Þorsteinsdóttir lauk námi frá tónfræðadeild Tónlistarskólans í Reykjavík og organistaprófi frá Tónskóla Þjóðkirkjunnar. Hún hefur starfað sem píanóleikari, organisti, útsetjari, kennari og tölvusett nótnabækur. Hún er meðleikari við söngdeild tónlistarskóla FÍH og er einnig í námi í rytmískri kennaradeild í Listaháskólanum. Ástrún Friðbjörnsdóttir er söngkona með bakgrunn í klassískum söng en er um þessar mundir að mennta sig í rytmískum söng. Hún hefur gefið út stuttskífuna Sandkorn og hefur einnig gefið út þrjú önnur lög. Fyrir jólin kemur út nýjasta lag hennar, jólalagið Ást og friður. Ástrún hefur sungið ýmiss konar tónlist, til dæmis flamenco, klassík og popp. Birgitta Sveinsdóttir er 23 ára gömul tónlistarkona úr Hafnarfirði. Tónlistin hefur fylgt henni frá ungum aldri og þegar hún var aðeins fjögurra ára gömul söng hún jólalög á geisladisk með foreldrum sínum. Hún stundaði bæði píanó- og söngnám sem barn, og er nú í námi í rytmískum söng á miðstigi við Tónlistarskóla FÍH. Birgitta hefur einnig verið virk í kórstarfi og syngur í Kammerkórnum Huldur. Fyrir utan tónlistarferilinn er hún í kennaranámi í HÍ og starfar samhliða því bæði sem grunnskólakennari og söngkennari. Steinunn Jónsdóttir er einn af forsprökkum hljómsveitanna Amabadama og Reykjavíkurdætur og hefur starfað við tónlist síðan 2011, bæði sem flytjandi og höfundur. Á sínum yngri árum lærði hún á víólu í Tónlistarskóla Kópavogs og söng í kór hjá Margréti Pálmadóttur. Í dag stundar hún nám í rytmískum söng í Tónlistarskóla FÍH. Samhliða tónlistarferlinum starfar Steinunn við tónlistardeild Fellaskóla og kennir börnum laga- og textasmíðar auk þess sem hún er blaðamaður hjá Birtingi.

List og náttúra með ÞYKJÓ!Þriðja fimmtudag hvers mánaðar fram að áramótum frá 16:00 – 17:00 í Gerðarsafni. Náttúran er magnaður myndhöggvari! Sjórinn slípar steina til, eldgos skilja eftir myndastyttugarða og hellismunnar myndast þar sem ís hefur bráðnað. Vilt þú koma og setja þig í stellingar náttúrunnar og móta landslagsskúlptúr? Smiðjan er leidd af hönnunarteyminu ÞYKJÓ og unnin í samstarfi á milli Gerðarsafns og Náttúrufræðistofu Kópavogs. Við könnum tengsl á milli höggmynda og náttúru í skapandi smiðjum fyrir fjölskyldur í Gerðarsafni. Tilgangurinn er að skapa tíma og rými fyrir samverustundir fjölskyldunnar eftir leikskóla eða skóla. Smiðjurnar eru fjórar og byggja þær hver ofan á fyrri og því engin eins. ÞYKJÓ er þverfaglegt teymi hönnuða sem vinna fyrir börn og fjölskyldur þeirra á sviði upplifunarhönnunar, innsetninga og vöruhönnunar. Hönnunarstarf þeirra miðar að því að örva ímyndunarafl og sköpunarkraft barna í samstarfi við mennta- og menningarstofnanir. Á meðal nýlegra verkefna er innsetningin Hljóðhimnar í Hörpu, húsgagnalínurnar Kyrrðarrými og Hreiður og þátttökuverkefnið Gullplatan. ÞYKJÓ hlaut Hönnunarverðlauna Íslands 2024 fyrir verkefnið Börnin að borðinu. Hópurinn hefur í tvígang hlotið tilnefningu til sömu verðlauna, árin 2021 og 2022 auk tilnefningu til alþjóðlegu YAM verðlaunanna. Á Hönnunarmars 2025 kom út Saga um Þykjó, bók sem dregur upp litríka mósaíkmynd af hönnunarferli og hugmyndafræði ÞYKJÓ hönnunarteymisins. Myndlist og náttúra er samstarfsverkefni Gerðarsafns og Náttúrufræðistofu Kópavogs og er stutt af Safnasjóði.

Langleggur og Skjóða eru systkini jólasveinanna og kunna margar skemmtilegar sögur úr Grýluhelli. Þau hafa heldur betur slegið í gegn síðustu ár og heimsækja hinar ýmsu jólaskemmtanir með glænýja jólasögu á hverju ári. Í ár segir Skjóða krökkunum sögu sem gerðist einmitt á jólunum. Jólin eru um það bil að fara að ganga í garð þegar Leppalúði pabbi hennar fær skyndilega tröllakvef. Hver á að elda jólagrautinn?Getur Skjóða bjargað jólunum? Sagan er um 20 mínútur að lengd og svo syngja þau vel valin jólalög með krökkunum á eftir. Mörg börn þekkja Skjóðu úr jóladagatali Hurðaskellis og Skjóðu, Jólasögum Skjóðu á Storytel og úr bíómyndinni Jólamóðir. Leikritið verður haldið utandyra, í rjóðrinu fyrir ofan Lindasafn / Lindaskóla í Núpalind 7, sem kallast Lindaskógur. Fyrir þau sem koma á bíl: bílastæði eru við Lindaskóla, bæði Núpalindarmegin og Galtalindarmegin. Fyrir þau sem ferðast með strætó: Leiðir 2 og 28 stoppa í nágrenni við skólann. Ef snjóar verða einnig nóg af lausum stæðum fyrir sleða og snjóþotur. Leikritið er ókeypis og öll eru hjartanlega velkomin!

Verið hjartanlega velkomin í Jólalund í Guðmundarlundi þar sem fram fer dásamleg fjölskyldudagskrá, alla sunnudaga fram að jólum á milli 12 og 15. Öll velkomin og ókeypis aðgangur.Ekki missa af jólaballinu hennar Rófu, tengingakapphlaupi Giljagaurs, danskennslu með Tásu, sveimandi ævintýraverum, blaðskellandi jólasveinum, rjúkandi heitu kakói, splunkunýjum ratleikjum, jólaföndri í dásamlegri náttúru eða því að kíkja í fataskápinn í Grýluhelli. Dagskráin er endurtekin yfir daginn svo að öll ættu að komast að, og koma sér í jólastemninguna með ævintýraverurm og jólasveinum. Ratleikur, danskennsla, búningamátun, leikir og föndur verður í boði á meðan opnun stendur og hægt verður að kaupa heitt kakó og piparkökur. Nánari tímasetningar:Jólaball Rófu12:2012:5013:2013:5014:20 Örtónleikar barnakóra í Kópavogi12:30 við inngang12:50 við kaffihúsið13:10 við leiktækin13:40 við kaffihúsið14:10 við inngang Við hlökkum til þess að sjá ykkur og njóta fjölskylduvænnar samveru í fallegu náttúrunni okkar hér í Kópavogi.Viðburðurinn er styrktur af lista- og menningarráði Kópavogsbæjar og Kópavogsbæ.

Jólakósídagar á aðalsafni 22. og 23. desember. Öll velkomin. 22. desember 10:00-17:30 Jólateiknismiðja Systu 10:00-17:30 Litum jólakúlur fyrir Jólatré Gloríu 14:00 Jólabíó í tilraunastofunni 16:00 Jólasögu- og söngstund með Braga Árnasyni Jólaratleikurinn verður á sínum stað á 1. hæð 23. desember 10:00-17:30 Jólateiknismiðja Systu 10:00-17:30 Litum jólakúlur fyrir Jólatré Gloríu 13:00 Jólasögustund í Djúpinu Jólaratleikurinn verður á sínum stað á 1. hæð