Hugmyndasöfnun fyrir Stelluróló

Kópavogsbær vinnur að endurgerð Holtsvallar, betur þekktur sem Stelluróló, sem er elsti gæsluvöllur bæjarins frá árinu 1959.

Í því samhengi er efnt til kynningar-, umræðu- og hugmyndafundar 16. apríl með það að markmiði að kynna tillögur að nýrri nálgun á nýtingu svæðisins og gefa íbúum tækifæri til að koma með hugmyndir, ábendingar og sjónarmið sem nýtast við áframhaldandi þróun svæðisins.

Til viðbótar við fundinn fer hugmyndasöfnunin fram á vefnum Betra Ísland. Hugmyndagáttin er opin frá 16.apríl til 30.apríl 2026

Stelluróló endurgerður: Hugmyndagátt

Úrvinnsla hugmynda

Allar innsendar hugmyndir fara í faglega og vandaða yfirferð hjá starfsmönnum Kópavogsbæjar.
Í þeirri vinnu er metið hvort hugmyndir falli að markmiði, umfangi og forsendum þessa tiltekna verkefnis, þar á meðal hlutverki svæðisins, skipulagi og ábyrgð sveitarfélagsins.
Þær tillögur sem teljast viðeigandi verða nýttar við áframhaldandi vinnslu verkefnisins.
Hugmyndir sem ekki eiga beint við í þessari endurgerð, en gætu átt erindi síðar, verða settar í sérstakan hugmyndabanka Kópavogsbæjar. Þar geta þær varðveist og mögulega nýst síðar við frekari uppbyggingu, þróun eða önnur verkefni innan bæjarins.
Með þessu verklagi er tryggt að allar hugmyndir fái málefnalega meðferð og að hugmyndasöfnunin styðji við gagnsæi, jafnræði og markvissa þróun í Kópavogi.