Íþróttakona og íþróttakarl ársins 2019 kosin af íbúum

Kópavogsbúar geta haft áhrif og kosið um íþróttakonu og íþróttakarl ársins 2019. Valið stendur á milli 10 íþróttamanna sem íþróttaráð Kópavogs valdi úr innsendum tilefningum frá íþróttafélögunum. Kjósa má einn karl og eina konu. Val á íþróttakarli og íþróttakonu verður kynnt á íþróttahátíð Kópavogs sem haldin verður í Samskipahöllinni, Reiðhöll Spretts föstudaginn 3.janúar 2020 kl 17:00.

Íþróttakarl og íþróttakona Kópavogs fá í sinn hlut farandbikar og eignarbikar auk peningaverðlauna frá Kópavogsbæ.

Kosning hefst þann 21.desember og lýkur 31.desember.

Kosningin er rafræn og fer fram í gegnum þjónustugátt Kópavogs. 

Hér má lesa um það íþróttafólk sem er í kjöri og skarað hefur framúr á árinu 2019. 

Agnes Suto-Tuuha: Fimleikakona úr Gerplu

Agnes varð Íslandsmeistari í áhaldafimleikum kvenna 2019. Hún varð bikarmeistari með liði Gerplu. Agnes var stigahæsti keppandinn í áhaldafimleikum á keppnistímabilinu 2018-2019. Keppti fyrir Ísland á öllum erlendum verkefnum keppnistímabilið 2018-2019,  Heimsmeistaramóti, Norðurlandamóti, Evrópumóti og  Heimsbikarmóti.  Agnes skipti yfir í hópfimleika nú í haust og vann sig inn í lið Gerplu sem tók þátt á Norðurlandamóti í hópfimleikum nú í nóvember.  Agnes er virkilega samviskusamur iðkandi, hún æfir vel, hún er skipulögð, frábær fyrirmynd ungra fimleikastúlkna. Agnes er fimleikakona árins 2019 hjá FSÍ.

Aron Snær Júlíusson: Kylfingur úr Golfklúbbi Kópavogs og Garðabæjar

Aron Snær hefur verið fastur maður í íslenska A-landsliðinu undanfarin ár og verið sá leikmaður sem hægt er að reiða sig á enda mjög öflugur og stöðugur kylfingur. Aron var í karlasveit GKG sem sigraði á Íslandsmóti golfklúbba í efstu deild. Hann ásamt tveimur öðrum lönduðu öðru sæti í Evrópumóti klúbbliða í Frakklandi, sem jafnaði besta árangur íslenskt liðs í golfi. Aron Snær hafnaði í 5. sæti í einstaklingskeppninni. Aron Snær tryggði sér þátttökurétt á Nordic League mótaröðinni fyrir næsta tímabil og leikur því á næsta ári í 3. deild atvinnumanna. Aron Snær er frábær fyrirmynd annarra, yngri sem eldri, reglusamur, vinnusamur og ávallt jákvæður.

Berglind Björg Þorvaldsdóttir: Knattspyrnukona úr  Breiðabliki

Berglind Björg hefur leikið 221 leiki í efstu deild kvenna,  þar af 198 leiki fyrir Breiðablik og skorað í þeim 144 mörk. Hún lék 17 leiki í Pepsídeild  kvenna í sumar  með Breiðabliki, skoraði í þeim 16 mörk og hreppti titilinn markadrottning Pepsídeildar kvenna árið 2019. Breiðablik átti góðu gengi að fagna í Meistaradeild Evrópu á árinu þar sem liðið féll úr keppni í 16 liða úrslitum eftir ósigur í tveimur leikjum gegn stórliði PSG frá Frakklandi.  Berglind lék alla 7 leiki liðsins og skoraði  í þeim tíu mörk og er ein af markahæstu leikmönnum  Meistaradeildar kvenna á árinu 2019. Berglind hefur leikið 44  landsleiki fyrir Íslands hönd og skorað í þeim fjögur mörk.

Hulda Clara Gestsdóttir: Kylfingur úr Golfklúbbi Kópavogs og Garðabæjar

Hulda Clara er fastaliðsmaður í A-landsliði kvenna og komin í allra fremstu röð golfkvenna á Íslandi. Hún lék með kvennalandsliðinu á EM kvenna á Ítalíu.  Á stigamótaröð GSÍ varð hún einu sinni í öðru sæti og tvisvar sinnum í þriðja sæti og hafnaði í þriðja sæti stigalistans eftir tímabilið. Hulda var lykilmaður í kvennasveit GKG sem sigraði á Íslandsmóti golfklúbba í efstu deild kvenna. Í Evrópumóti klúbbliða hafnaði GKG sveitin í 7. sæti og gerði Hulda sér lítið fyrir og sigraði í einstaklingskeppninni, fyrst íslenskra kvenna til að ná því afreki. Hulda Clara hefur mikinn metnað og dugnað sem hefur komið henni nú þegar í fremstu röð.

Ingvar Ómarsson: Hjólreiðamaður úr Breiðablik

Ingvar átti sitt besta ár á ferlinum í ár, og varð Íslandsmeistari í fjórum greinum af sex í hjólreiðum, ásamt því að vera kjörinn hjólreiðamaður ársins, sjötta árið í röð. Fyrir hönd Íslands keppti hann á Evrópumeistaramóti í maraþon-fjallahjólreiðum og hafnaði í 37. sæti, Heimsmeistaramóti í ólympískum fjallahjólreiðum og hafnaði í 82. sæti, og Heimsmeistaramóti í maraþon fjallahjólreiðum og hafnaði í 87. sæti sem er jafnframt einn besti árangur Íslendings á stórmóti í hjólreiðum. Heima átti hann frábært mót í malarkeppninni The Rift, þar sem hann hafnaði í 3. sæti á eftir tveimur Bandaríkjamönnum sem eru taldir þeir bestu í heiminum í greininni. Samtals sigraði hann tólf keppnir á árinu.

Ívar Ragnarsson: Skotfimimaður úr Skotíþróttafélagi Kópavogs

Ívar keppti á smáþjóðaleikunum í Svartfjallalandi og hafnaði í 5. sæti eftir að hafa komist í úrslit. Ívar varð Íslandsmeistari í  staðlaðri skammbyssu og grófri skammbyssu ásamt því að vinna Íslandslandsmót í loftbyssu karla nú í lok ársins. Hann hefur staðið framarlega í skotíþróttum á Íslandi síðastliðin ár.  Ívar hefur síðustu ár keppt í staðlaðri skammbyssu,  sportskammbyssu, grófskammbyssu og loftskammbyssu karla.  Ívar komst í úrslit á Smáþjóðaleikunum í Svartfjallalandi og hafnaði þar  í  5. sæti.

Patrik Viggó Vilbergsson: Sundmaður frá Breiðablik

Patrik Viggó er orðinn sterkasti langsundsmaður landsins aðeins 17 ára gamall. Hann varð fjórfaldur Íslandsmeistari í 25 m laug og þrefaldur Íslandsmeistari í 50 m laug.  Auk þess náði hann í þrenn silfurverðlaun á þessum mótum. Hann bætti nokkur íslandsmet í piltaflokki  (15 til 17 ára) frá 100 m skriðsundi upp í 1500 m skriðsundi á árinu.  Hann keppti á Smáþjóðaleikunum fyrir Íslands hönd og vann til bronsverðlauna í 4x200m skriðsundi. Hann keppti á Evrópumeistaramóti  unglinga  í sumar og stóð sig mjög vel. Á Norðurlandameistaramótinu í Færeyjum var hann í úrslitum í sínum greinum og varð hársbreidd frá verðlaunum í 400 m og  800 m skriðsundi.  Patrik er mjög vinnusamur og hæfileikaríkur sundmaður sem á eftir að koma honum langt í sundíþróttinni. 

 Ragna Sigríður Ragnarsdóttir: Sundkona úr Breiðablik

Ragna Sigríður varð Íslandsmeistari í 400 m skriðsundi í 50 m laug núna í apríl sl.  Hún var í sigursveit Breiðabliks sem vann 4x200 m skriðsund á mótinu. Hún varð þrefaldur Íslandsmeistari í 25 m lauginni  í 1500 m skriðsundi 800m skriðsund og 400 m skriðsundi og einnig  í sigursveit Breiðabliks í 4x200 m skriðsundi.  Ragna Sigríður var í sundlandsliði Íslands á Smáþjóðaleikum. Hún náði lágmörkum á Norðurlandameistaramótið sem haldið var í Færeyjum núna í desember  og náði góðum árangri í 800 m skriðsund og nældi sér í bronsverðlaun á því móti. Ragna Sigríður er góð fyrirmynd fyrir sunddeildina af báðum kynjum og á öllum aldri. Í vetur hefur hún þjálfað yngri hópa hjá sunddeildinni og miðlar þannig sinni reynslu til yngri iðkenda.

Svana Katla Þorsteinsdóttir: Karatekona úr Breiðablik 

Svana er ósigruð í einstaklingskata undanfarin fimm ár og er Íslandsmeistari í kata kvenna, fimmta árið í röð sem er magnaður árangur. Svana er fastamaður í landsliði Íslands og hefur tekið þátt í fjölmörgum verkefnum með því og unnið til verðlauna.  Á árinu varð hún í  2. sæti Kata senior og Teamkata á Smáþjóðaleikunum sem voru haldnir hérna heima í ár. Svana Katla er góð fyrirmynd fyrir karateiðkendur af báðum kynjum og á öllum aldri fyrir utan og á æfingum. Auk þess er hún að þjálfa yngri keppendur hjá Breiðablik og deilir með þeim reynslu sinni.

Valgarð Reinhardsson: Fimleikamaður úr Gerplu

Valgarð er fremsti fimleikamaður landsins. Hann er núverandi Íslandsmeistari í áhaldafimleikum karla og var í sigurliði Gerplu á bikarkeppni 2019. Valgarð hefur tekið þátt í fjölda fimleikakeppna á erlendum vettvangi á árinu og hefur náð góðum árangri þar. Á heimsbikarmóti í Koper keppti hann í úrslitum í gólfæfingum og hafnaði í 6. sæti af átta sem komust í úrslit og var næstur inn í úrslit á tvíslá. Hann keppti á Evrópuleikum í Hvíta Rússlandi í júlí og náði 46. sæti  og á Heimsmeistaramótinu í Stuttgart og hafnaði hann í 95. sæti af 146 keppendum. Hann keppti á heimsbikarmótinu í Melbourne og var mjög nálægt úrslitum á tvíslá og svifrá. Valgarð er fimleikamaður ársins 2019 hjá FSÍ.