Listaverk Kópavogsdaga lifa áfram

12.05.2014 Fréttir
Listaverk prýðir útivegg
Listaverk prýðir útivegg

Kópavogsdögum, menningarhátíð Kópavogs, lauk um helgina og var góður rómur gerður að fjölbreyttum viðburðum hátíðarinnar. Fjölmargir lögðu leið sína á menningarhátíð Smáraskóla, á handverkssýningar eldri borgara, á pönktónleika og á vinnustofur listamanna. Tilgangur hátíðarinnar er að vekja athygli á því mikla menningarstarfi sem fram fer í bænum allan ársins hring. 

Karlakór Kópavogs rúntaði um bæinn á laugardeginum og kom m.a. við á menningartorfunni, í sundi, í  Smáralind og á myndlistarsýningum. Leiksýningar voru settar upp fyrir börn í Bókasafni Kópavogs og tónleikar haldnir í Salnum og Tónlistarsafni Íslands. Danshópurinn Raven sýndi einnig listir sínar við Gerðarsafn og fékk til liðs við sig börn úr grunnskólum Kópavogs.

Listaverk fæddust á hátíðinni og má þar nefna stórt verk sem nú prýðir gaflinn á Hamraborg 9. Listakonan Kristín Þorláksdóttir á heiðurinn að því verki. Hún vísar í verkinu til Kópavogsskáldsins Jóns úr Vör og ljóðs hans Ómáluð mynd.

Tréið við Café Dix í Hamraborginni hefur einnig öðlast nýtt líf, því listakonan Eygló Benediktsdóttir, hengdi á það handgerð postulínslaufblöð í upphafi Kópavogsdaganna með hjálp leikskólabarna.

Verðlaunaljóð grunnskólabarna og handhafa Ljóðstafs Jóns úr Vör fljóta enn í sundlaugum Kópavogs og þau hanga einnig í strætisvögnum sem eiga leið um bæinn, svo sem leið 2, leið 4, leið 28 og leið 35.

Kópavogsbær þakkar öllum þeim sem lögðu hönd á plóg við að gera hátíðina sem veglegasta.

Aftur í yfirlit