Bæjarstjórn fundaði með börnum og ungmennum

Þriðjudaginn 13. maí fundaði Bæjarstjórn Kópavogs með fulltrúum ungmennaráðs og grunnskólabarna bæjarins. Á fundinum voru lagðar fram tillögur Barna- og ungmennaþings en það er einn af hornsteinum barnvæns sveitarfélags, eins og Kópavogur er, að börn og ungmenni fái að koma sjónarmiðum sínum á framfæri.

Fulltrúar grunnskólabarna mættu til fundarins með sex tillögur sem eru afrakstur skólaþinga í grunnskólum bæjarins og Barnaþings sem haldið var í mars síðastliðnum. Barnaþing vann úr tillögunum og setti í umsögn og kosningu meðal barna bæjarins. Þá kynntu fulltrúar ungmennaráðs fimm tillögur sem eru afrakstur ungmennaþings.

Meðal tillagna barnaþingmanna var að börn fái frítt í strætó, að íþróttatímum verði fjölgað og að boðið verði upp á morgunmat fyrir alla árganga í öllum skólum og ísbúð veðri opnuð á Kársnesi.

Fulltrúar ungmennaráðs lögðu til að frístundastyrkur verði hækkaður, að opnunartími félagsmiðstöðva verði lengdur, að meiri samræmi verði í einkunnagjöf í grunnskólum Kópavogs og tryggt verði að íþrótta- og tómstundafélög taki á móti fjölbreyttum hópi.

Bæjarfulltrúar brugðust við tillögunum og fögnuðu tækifærinu til að funda með börnum og ungmennum. Tillögurnar sem voru bornar fram verða settar í farveg innan sveitarfélagsins.

Tillögur Barnaþings Kópavogs 2025

1. Frítt í Strætó fyrir öll börn í Kópavogi.
2. Göt í stundatöflu í byrjun og lok dags.
3. Morgunmatur í boði í öllum skólum í Kópavogi.
4. Fjölga íþróttatímum eða lengja þá.
5. Ísbúð á Kársnesi.
6. Halda hátíð í Kópavogi.

Tillögur Ungmennaþings Kópavogs 2025

1. Fleiri opnanir í félagsmiðstöðvum (fleiri kvöldopnanir og auka miðstigsstarf).
2. Hækka frístundastyrk Kópavogs.
3. Fartölvur á unglingastig í grunnskóla.
4. Meira samræmi á einkunnargjöf í grunnskólum Kópavogs.
5. Tryggja að íþróttafélög og tómstundastarf taki meðvitað á móti fjölbreyttum hópum, til dæmis með því að efla aðstöðu, fataskipti, þjálfun og fræðslu.