Blómlegt starf á Álfaheiði

26.08.2013 Fréttir
Kátir krakkar frá Álfaheiði.
Kátir krakkar frá Álfaheiði.

Börn og starfsmenn leikskólans Álfaheiði í Kópavogi hafa sinnt garðyrkjurækt af miklum myndarskap í sumar og hefur það skilað sér með góðri uppskeru. Uppskeruhátíð fór fram í síðustu viku og voru börn og starfsmenn að vonum glöð með árangurinn. Mikil áhersla er lögð á umhverfismál í skólanum og hafa börnin meðal annars fylgst með því í moltutunnum hvernig lífrænn úrgangur verður að mold.

Kópavogsbær hefur lagt mikinn metnað og fjármagn til að gera lóðina sem best úr garði og í sumar voru girðingar og pallar á lóð leikskólans fúavarin og gengið frá örfáum atriðum sem kláruðust ekki á síðasta ári.

Matjurtagarður vestanmegin á lóð var útbúinn af starfsmönnum leikskólans á glæsilegan hátt með góðri aðstoð starfsmanna garðyrkjudeildar bæjarins.

Gróðursett voru fleiri ávaxtatré og nú er skólinn með epla –, plómu - og kirsuberjatré í garðinum. Á kirsuberjatréð eru strax komin nokkur ber svo ávaxtaræktin lofar góðu !

Leikskólinn Álfaheiði.

Aftur í yfirlit