Álfaheiði tilnefnd til hljóðvistarverðlaunanna 2025

Leikskólinn Álfaheiði var tilnefndur til Íslensku hljóðvistarverðlaunanna 2025 – verðlauna sem veitt eru fyrir framúrskarandi hljóðhönnun og vandað umhverfi þann 12. nóvember 2025. Alls voru sex leikskólar tilnefndir og hlaut leikskólinn Aldan verðlaunin að þessu sinni.

Við umfangsmiklar endurbætur á Álfaheiði var lögð sérstök áhersla á að skapa heilnæmt rými þar sem hljóðvist og loftgæði styðja vellíðan barna og starfsfólks. Góð hljóðvist skiptir miklu máli fyrir einbeitingu, samskipti og öryggi í leikskólaumhverfi og niðurstöður mælinga sýna að markmiðum hefur verið náð í þeim rýmum sem lagfærð voru.

"Það er okkur mikill heiður að fá tilnefningu til Íslensku Hljóðvistarverðlaunanna 2025 sem er viðurkenning á því að vel hefur tekist til endurbóta á leikskólanum. Við þökkum Kópavogsbæ fyrir metnaðarfullt samstarf og lausnamiðaða nálgun sem gerði þetta mögulegt," segja þær Anna Rósa Sigurjónsdóttir og Rakel Ýr Ísaksen stjórnendur leikskólans Álfaheiði.