Dagar ljóðsins í Kópavogi

20.01.2015 Fréttir
Dagar ljóðsins standa yfir til 25. janúar
Dagar ljóðsins standa yfir til 25. janúar

Dagar ljóðsins í Kópavogi hefjast með  ljóðahátíð Jóns úr Vör í Salnum, miðvikudaginn 21. janúar, kl. 17.00. Allir eru velkomnir á ljóðahátíðina en þar verða veitt verðlaun í ljóðasamkeppni Kópavogsbæjar. Dagar ljóðsins standa yfir til 25. janúar en á þeim tíma mega Kópavogsbúar eiga von á því að rekast á ljóð á hinum ólíklegustu stöðum, til dæmis í sundi, í strætó,  á vefsíðum, við verslunarkjarna á Nýbýlavegi eða í Smáralind. 

Ljóð fást gefins í Bókasafni Kópavogs og í öðrum menningarstofnunum bæjarins og víða um bæ verður pop up ljóðalestur. Markmið Daga ljóðsins í Kópavogi er að vekja áhuga á ljóðalestri og efla ljóðlistina með því að dreifa ljóðum um bæinn.

Miðpunktur Daga ljóðsins verður í Bókasafni Kópavogs. Á annarri hæð safnsins við Hamraborgina verður hægt að nálgast með aðgengilegum hætti ljóðabækur, gamlar og nýjar, til útláns. Höfundur vikunnar á safninu er Gerður Kristný skáld en hún hlaut Ljóðstaf Jóns úr Vör, ljóðasamkeppni Kópavogsbæjar, árið 2010.

Gestum safnsins býðst einnig að spreyta sig á því að blanda saman þekktum ljóðlínum, á ljóðavegg sem verður, og mynda þar með sitt eigið ljóð. Í afgreiðslu safnsins, eins og í öðrum menningarhúsum bæjarins, fást gefins ljóð eftir Jón úr Vör og félaga í Ritlistarhópi Kópavogs.

Dagar ljóðsins er hátíð skipulögð af Listhúsi Kópavogs í samráði við lista- og menningarráð með styrk úr lista- og menningarsjóði.

Aftur í yfirlit