Góð aðsókn að Safnanótt

Góð aðsókn var á Safnanótt í Kópavogi á föstudagskvöld en fimm söfn á menningarholti bæjarsins buðu afar fjölbreytta dagskrá. Safnanótt er samstarfsverkefni sveitarfélaga á höfuðborgarsvæðinu en tilgangurinn er að vekja athygli á því mikla starfi sem fram fer í söfnum á svæðinu.

Þetta er í áttunda sinn sem Safnanótt er haldin. Yfirskriftin í ár var: Magnað myrkur.

Opið var frá kl. 19:00 til 24:00 í Gerðarsafni, Náttúrufræðistofu Kópavogs, Bókasafni Kópavogs, Tónlistarsafni Íslands og ungmennahúsinu Molanum. 

Fjöldi fólks lagði leið sína á hina ýmsu sýningar og uppákomur á söfnunum og er jafnvel talið að aldrei fleiri hafi mætt á Safnanótt í Kópavogi.