Tendrað á jólastjörnunni

Tendrað var á jólastjörnunni á Hálsatogi í Kópavogi í morgun. Börn úr Barnaskóla Kársness voru viðstödd og sungu nokkur jólalög og dönsuðu í kringum stjörnuna. Þóra Marteinsdóttir stýrði söngnum og Ástvaldur Traustason lék á harmonikku.

Þetta er í sjöunda árið sem stjarnan prýðir Hálsatorg og veitir fallega lýsingu á svæðinu, til gleði fyrir gangandi og akandi vegfarendur. Uppsetning jóla- og skammdegisljósa er nú langt komin hjá Kópavogsbæ, og lokahnykkurinn verður þegar tendrað er á jólatré bæjarins á Aðventuhátíð Kópavogsbæjar.

Tendrun stjörnunnar er orðinn fastur liður í jólaundirbúningi bæjarins og er upptaktur að Aðventuhátíðinni sem fer fram 29.nóvember.