Lemon opnar í Salalauginni Kópavogi

Lemon hefur nú opnað veitingastað í Salalauginni í Kópavogi. Þetta er fyrsti Lemon staðurinn í Kópavogi en veitingastaðir Lemon eru sex og eru þeir staðsettir í Reykjavík, Hafnarfirði, Akureyri, París og nú í Kópavogi. 

Veitingastaðurinn Lemon var valinn úr hópi fjölda umsækjenda, en Kópavogsbær auglýsti eftir áhugasömum aðilum til að sjá um veitingasölu í Salalauginni í Kópavogi. 

Guðmundur Halldórsson, forstöðumaður Salalaugarinnar segir Lemon falla vel inn í Lýðheilsustefnu Kópavogsbæjar og hafði það mikil áhrif á val staðarins. Að sögn Guðmundar fer samstarfið vel af stað og mikil eftirvænting ríkir á meðal Kópavogsbúa og annarra gesta sundlaugarinnar. 

„Þetta er frábær staðsetning fyrir veitingastað eins og Lemon þar sem hollusta og hreyfing fara vel saman. Lemon býður upp á ferskan og safaríkan mat, matreiddan á staðnum úr besta mögulega hráefni hverju sinni. Það er mantran okkar og við víkjum aldrei frá henni“, segir Jóhanna Soffía Birgisdóttir, framkvæmdastjóri Lemon. 

Ármann Kr. Ólafsson bæjarstjóri í Kópavogi var snöggur til og var meðal fyrstu gesta veitingastaðarins.