Ný dagvist fyrir aldraða tekin í notkun í Kópavogi

Samningurinn léttir verulega á brýnni þörf fyrir dagvist í bæjarfélaginu, en gera má ráð fyrir að allt að níutíu manns geti nýtt sér þjónustuna.

Bæjarstjóri Kópavogs, Guðrún Pálsdóttir, og Guðmundur Hallvarðsson, formaður Sjómannadagsráðs, undirrituðu samkomulagið í Boðaþingi í dag.

Samkomulagið felur í sér mikla breytingu á þjónustu við aldraða í bænum en fyrir hafa Kópavogsbúar dagvistarúrræði í Sunnuhlíð. Dagvistun er eitt af þeim úrræðum sem boðið er  upp á til að fólk geti búið sem lengst heima. Með slíku úrræði fá aldraðir fjölbreytta þjónustu í formi heilsueflingar og afþreyingar. Það dregur jafnframt úr einangrun og örvar fólk bæði félagslega og andlega.

Hrafnista mun annast rekstur dagvistarrýmanna á annarri hæð þjónustumiðstöðvarinnar í Boðaþingi en Kópavogsbær mun eftir sem áður greiða fastan kostnað af mannvirkinu, viðhald, hita og rafmagn. Þá tekur bærinn þátt í stofnkostnaði við dagvistunina til jafns á við hjúkrunarheimilið. Í samkomulaginu er einnig kveðið á um að DAS reki áfram, í eitt ár til viðbótar, sundlaug fyrir eldri íbúa Kópavogsbæjar í Boðaþingi en  laugin var vígð í maí á síðasta ári.

Áætlað er að dagvistin taki formlega til starfa á hlaupaársdaginn 29. febrúar næstkomandi, og er þeim bæjarbúum í Kópavogi sem hafa áhuga á að nýta sér þjónustuna bent á að hafa samband í síma 693 9506.

Hrafnista rekur nú þegar 44 hjúkrunarrými í Boðaþingi og Kópavogsbær rekur þar þjónustumiðstöð sem m.a. hýsir félagsstarf eldri borgara í bænum og aðra fjölbreytta þjónustu fyrir þann aldurshóp.