Samgönguviku ýtt úr vör

Samgönguvikan hér er hluti af hinni evrópsku samgönguviku sem haldin hefur verið árlega í fjölmörgum borgum og bæjum víða um Evrópu. Kópavogsbær hefur tekið þátt í samgönguvikunni frá árinu 2007 með ýmsum viðburðum og uppákomum. Höfuðmarkmiðið er að draga úr mengun og hávaða.

Í Kópavogi hefur margt verið gert til að hvetja til umhverfisvænni samgöngumáta og er skemmst að minnast hjólreiðaáætlunar sem bæjaryfirvöld hafa samþykkt að vinna eftir. Hefur bærinn þar með skipað sér í fremstu röð þeirra sveitarfélaga sem vinna skipulega að bættum samgöngum fyrir hjólreiðamenn.

Einnig má geta þess að vinna er hafin við endurbætur á göngu- og hjólreiðastíg meðfram Hafnarfjarðarveginum. Áætlanir gera ráð fyrir að framkvæmdum við stíginn frá Salnum og niður að undirgöngum á Kópavogstúninu verði lokið innan tíðar.

Í tilefni þess að samgönguvikan var að hefjast fór fram hjólreiðadagur fjölskyldunnar á sunnudag og kom hjólalest úr nágrannasveitarfélögunum til Kópavogs um hádegi á sunnudag. Bæjarstjórinn og aðrir Kópavogsbúar slógust þar í för og var haldið sem leið ná niður á Árbæjarsafn.

Dagskrá samgönguvikunnar má finna á viðburðadagatali bæjarsins sem er neðst á forsíðu vefjar Kópavogsbæjar. Með því að færa bendilinn yfir dagana og smella á þá má sjá viðburði hvers dags.