Sumardagurinn fyrsti í Kópavogi

Frá hátíðarhöldum á sumardaginn fyrsta 2013.
Frá hátíðarhöldum á sumardaginn fyrsta 2013.

Hátíðarhöld í tilefni sumardagsins fyrsta verða að venju í Kópavogi. Dagskráin hefst með skátamessu í Digraneskirkju. Þá verður skrúðganga og fjölskylduskemmtun í Fífunni auk þess sem klifurveggur og hoppukastalar standa gestum til boða. Skátafélagið Kópar sér um dagskrána.

Skátarnir leiða skrúðgönguna sem hefst við Digraneskirkju en lýkur í Fífunni. Þar verða ýmis skemmtiatriði og mikið fjör. Ármann Kr. Ólafsson bæjarstjóri ávarpar gesti, leikhópurinn Lotta kíkir í heimsókn, Tara Sóley sigurvegari söngkeppni íþrótta- og tómstundaráðs Kópavogs stígur á svið, Höskuldur Þór Jónsson og Margrét Hörn Jóhannsdóttir sem keppa til úrslita í Ísland got talent dansa fyrir gesti og jójómeistarinn Páll Valdimar úr Ísland got talent mætir á staðinn. Þá verður klifurveggur á staðnum og hoppukastalar.

Dagskráin í Kópavogi verður sem hér segir á sumardaginn fyrsta 24. apríl.

11.00: Skátamessa í Digraneskirkju.

13.30: Skrúðganga frá Digraneskirkju í Fífuna.

14.00-16.00: Fjölskylduskemmtun í Fífunni.