Skoða hvort nýta megi undirgöngin

Lista- og menningarráð Kópavogsbæjar er að skoða hvort og þá hvernig nýta megi undirgöngin að gömlu skiptistöðinni í Kópavogi. Göngin voru áður einn helsti samkomustaður ungmenna úr bænum. Ráðið fór í vettvangsferð um göngin á síðasta fundi sínum en með í för var m.a. Valgarður Guðjónsson, tónlistarmaður með meiru, sem undirbýr pönkhátíð í bænum með stuðningi ráðsins. Göngin hafa undanfarin ár verið læst almenningi.

Undirgöngin lágu upphaflega frá gömlu skiptistöðinni að gamla Pósthúsinu við Digranesveg. Þau tengdu jafnframt Hamraborgina við samgöngur. Í greinargerð með fyrrnefndri tillögu segir að undirgöngin hafi leikið stórt hlutverk í pönkmenningunni á áttunda og níunda áratugnum og að graffiti listin á Íslandi hafi þar jafnframt slitið barnsskónum. 

 

Enn má sjá graffiti verk í göngunum eins og meðfylgjandi mynd ber með sér en hún var tekin í vettvangsferðinni. 

 

Formaður lista- og menningarráðs er Karen E. Halldórsdóttir.