Metþátttaka í Okkar Kópavogi

Metþátttaka var í hugmyndasöfnun í íbúalýðræðisverkefninu Okkar Kópavogur en henni lauk í vikunni. Alls söfnuðust 506 hugmyndir í Kópavogi í fimm hverfum: Kársnesi, Digranes, Smárahverfi, Fífuhvamm (Lindir og Salir) og Vatnsenda.

Einnig var mjög mikil þátttaka á vef verkefnisins, en með þátttöku er átt við þá sem komu inn á vefinn og fluttu rök með eða á móti hugmyndum, líkuðu við hugmyndir og svo framvegis. Alls voru tæplega 2.500 notendur að þessu sinni, sem er ríflega 70% aukning frá síðast en hugmyndum fjölgaði einnig um ríflega 70% frá því að hugmyndasöfnun var síðast í gangi, úr 291 í 506. 

Hugmyndum var safnað á vef verkefnisins og er hægt að skoða þær þar. Þar eru einnig þær hugmyndir sem söfnuðust á íbúafundum og meðal eldri borgara sem voru heimsóttir í félagsmiðstöðvar bæjarins. Þá má þess geta að börn í 5. til 10.bekk fengu tengil í spjaldtölvurnar sínar á vef verkefnisins til að auðvelda þeim þátttöku í hugmyndasöfnuninni.

Kosning í verkefninu fer fram í lok janúar og byrjun febrúar á næsta ári. Þá er kosið á milli hugmynda í hverju hverfi en hverfin fá úthlutað fé í verkefnið eftir íbúafjölda. Alls eru 200 milljónir settar í Okkar Kópavog 2021-2023. Miðað er við að framkvæmdir verkefnanna sem verða fyrir valinu sé lokið 2023.

Kosningarétt í Okkar Kópavogi hafa íbúar í bænum, og hefur kosningaaldur verið lækkaður niður í 14 ára á árinu 2022. Til þess að kjósa þarf rafræn skilríki.

Þetta er í fjórða sinn sem hugmyndasöfnun fer fram í Okkar Kópavogi og hafa tæplega 100 hugmyndir Kópavogsbúa verið valdar af íbúum í þremur kosningum.