Lokahátíð Skapandi sumarstarfa

25 listamenn hafa starfað í 13 hópum undir hatti Skapandi sumarstarfa í sumar. Verkefnin sem voru valin í ár eru af ólíkum toga og gestir á lokahátíðinni mega því búast við einkar fjölbreyttri listaflóru.

Meðal nýjunga sem bryddað var upp á í ár var stuttmyndakeppnin Gullmolinn 2014 sem haldin var hátíðleg í fyrsta sinn í Ungmennahúsinu Molanum 17. júlí síðastliðinn fyrir fullu húsi.

Þá hefur klarinettudúóið Dúó Nítsirkasíle haldið tónleika á ýmsum stöðum í Kópavogsbæ, Hljóðinnréttingar Kópavogs sett svip sinn á bæinn, glerlistamaðurinn Tryggvi Þór Pétursson unnið að glerlistaverkum fyrir fyrirtæki í Hamraborginni, Bestival lífgað upp á opin svæði í bænum og svo mætti lengi telja. 

Hátíðin fer fram í ungmennahúsinu Molanum, Hábraut 2. Dagskrá hefst klukkan 20:00 en að henni lokinni verður hægt að skoða listaverkin fram eftir kvöldi og njóta léttra veitinga.

Lokahátíð Skapandi Sumarstarfa er fyrirtaks tækifæri til að kynnast því sem ungir listamenn úr Kópavogi eru að fást við. 

Aðgangur er ókeypis.