Kópavogsdagar 4. til 11. maí

Líf og fjör í Kópavogslaug
Líf og fjör í Kópavogslaug

Menningarhátíð Kópavogs, Kópavogsdagar, hófst í Sundlaug Kópavogs í morgun með söng Samkórs Kópavogs undir stjórn Skarphéðins Þórs Hjartarsonar. Hátíðin mun setja svip sinn á bæjarlífið næstu vikuna en þetta er í tíunda sinn sem hátíðin er haldin. Kvennakór Kópavogs syngur í Hamraborg 1 til 3 kl. 17 í dag.

Markmiðið með Kópavogsdögum er að gefa bæjarbúum og öðrum gestum færi á að njóta afraksturs þess mikla lista- og menningarstarfs sem fram fer í bænum allan ársins hring.

Dagskráin er fjölbreytt að vanda en að henni koma listamenn, kórar, félagsmiðstöðvar eldri borgara og fleiri og má af dagskrárliðum m.a. nefna handverkssýningar eldri borgara, barnatónleika í Salnum, gospeltónleika í Kópavogskirkju og fræðslugöngu um Hamraborgina.

Kvöldskóli Kópavogs verður með vorsýningu í Snælandsskóla á morgun og 25 ára afmælissýning Myndlistarskóla Kópavogs verður opnuð í Gerðarsafni næstu helgi, svo fleiri dæmi séu nefnd

Nánari upplýsingar eru á kopavogsdagar.is