Telja að brú yfir Fossvog verði mikil samgöngubót

Greinargerðin var til umfjöllunar í bæjarráði og borgarráði fyrir hádegi í dag en bæjarstjóri Kópavogs, Ármann Kr. Ólafsson, og borgarstjóri Reykjavíkur, Jón Gnarr, hafa báðir verið talsmenn þess að kostir þess að brúin verði byggð verði kannaðir til hlítar.

Í greinargerðinni er farið yfir mögulega staðsetningu brúarinnar, kostnað, byggingartíma og áhrif hennar á siglingafélög í Fossvogi, umhverfið og fleira. Fjallað er um kosti þess að hafa brúna eingöngu fyrir gangandi og hjólandi umferð eða að leyfa jafnframt akstur strætisvagna yfir brúna. Þá eru skoðaðir möguleikar á því að hafa brúna opnanlega snúningsbrú með 20 metra breiðu siglingaopi.

Áætlaður kostnaður við gerð 270 metra göngu- og hjólabrúar er 950 milljónir króna. Ef strætisvagnar eiga að geta ekið yfir brúna er kostnaður við brúna áætlaður1,250 milljónir króna. Ódýrasti möguleikinn, 100 metra göngu- og hjólabrú, er metinn á 640 milljónir króna. Sá möguleiki að geta opnað brúna fyrir bátaumferð  kostar 150 milljónir króna til viðbótar.

Gert er ráð fyrir að bygging brúarinnar taki um það bil eitt ár. Annar undirbúningur, svo sem umhverfismat og skipulagsvinna, gæti tekið um eitt til tvö ár til viðbótar.

Nú stendur yfir vinna við gerð aðalskipulags í Kópavogi og í Reykjavík og verður þessi hugmynd lögð inn í þá vinnu, en ekki er gert ráð fyrir brú á þessum stað í eldra aðalskipulagi.

Í greinargerð starfshópsins segir að brúin yrði mikil samgöngubót á höfuðborgarsvæðinu. Sérstaklega mun hún þó bæta samgöngur fyrir íbúa Kársness. Hún félli vel að þeim markmiðum Kópavogs og Reykjavíkur að stuðla að vistvænum samgöngum og breyttum ferðavenjum. Talning sem Reykjavíkurborg og Kópavogsbær létu gera á umferð hjólandi og gangandi vegfarenda við botn Fossvogs árið 2011 gefur til kynna að um 500 til 1000 manns séu á ferðinni þar á degi hverjum. Um fimm til sjö mínútur tæki að ganga yfir brúna.

Í starfshópnum voru: Steingrímur Hauksson, sviðsstjóri umhverfissviðs Kópavogsbæjar, Birgir H. Sigurðsson, skipulagsstjóri Kópavogs, Ólafur Bjarnason, samgöngustjóri Reykjavíkurborgar, Björn Axelsson, skipulagsfulltrúi Reykjavíkurborgar og Magnús Ólafur Einarsson, fulltrúi Vegagerðarinnar. Ráðgjafi starfshópsins var verkfræðistofan EFLA.

Greinargerð starfshópsins.