Uppskeruhátíð í Kópavogi

Mikill metnaður og fjölbreytni einkenndi uppskeruhátíð spjaldtölvuverkefnis grunnskóla í Kópavogi sem haldin var í þriðja sinn í Salnum 12. apríl.

Nemendur úr öllum grunnskólum Kópavogs sýndu og sögðu frá hvernig spjaldtölvan hefur haft áhrif á nám þeirra utan sem innan skóla. Yngstu nemendurnir sem stigu á stokk eru í þriðja bekk í Kópavogsskóla en þar er unnið markvisst með þjálfun yngstu nemendanna í vinnubrögðum með snjalltækin, en allir nemendur í grunnskólum Kópavogs fá sína eigin spjaldtölvu til afnota við byrjun fimmta bekkjar.

Útskriftarnemendur frá Salaskóla sýndu myndband þar sem teknir voru saman helstu þræðir þeirra umbóta sem spjaldtölvuinnleiðingin hefur haft á nám og skólastarf en þessir nemendur voru í hópi þeirra fyrstu sem fengu spjaldtölvur í Kópavogi haustið 2015 og hafa því getað nýtt sér þær í náminu allt unglingastigið.

Einnig var sagt frá samvinnuverkefni nemenda úr mörgum skólum þar sem unnið hefur verið að þróun apps í samstarfi við Listasafn Íslands og Menntamálastofnun sem prófað verður í listgreinakennslu nú í vor.

Nemendurnir sýndu svo ekki verður um villst að breyttir kennsluhættir eru að festa sig í sessi í grunnskólum Kópavogs.