Barnaþing Kópavogs

Barnaþing Kópavogs fór fram í Safnaðarheimilinu Borgir þann 18. mars með þátttöku barnaþingmanna úr öllum grunnskólum bæjarins.

 

„Barnaþingið er einstakt tækifæri til að hlusta á börnin sjálf og læra af þeirra sýn á okkar skólasamfélag. Tillögurnar endurspegla hvað skiptir þau raunverulegu máli og hjálpa okkur að taka betri ákvarðanir í þágu allra barna í Kópavogi.“

— Ásdís Kristjánsdóttir, bæjarstjóri Kópavogs.

 

Áður en þingið hófst tóku börnin þátt í skólaþingi í sínum skóla þar sem þau ræddu málefni sem þeim voru mikilvæg. Hver skóli valdi tvær tillögur sem barnaþingmenn komu með inn á Barnaþingið, þar sem unnið var áfram með hugmyndirnar í umræðuhópum.

 

Í aðdraganda Barnaþings var sérstaklega lagt upp úr því að tryggja breiða og fjölbreytta þátttöku barna. Framkvæmd voru rýnihópaviðtöl við börn með fjölbreyttan tungumála- og menningarbakgrunn til að fanga betur þeirra sjónarmið og tryggja að raddir þeirra skiluðu sér inn í umræðuna. Þá var einnig lögð sérstök áhersla á að efla þátttöku barna með stuðningsþarfir í samstarfi við Hrafninn frístundaklúbb, sem starfar með börnum í 5.–10. bekk með fjölbreyttar stuðningsþarfir.

 

Að loknum umræðum völdu barnaþingmenn þær tillögur sem þeir telja mikilvægastar og verða þær lagðar fyrir alla nemendur í grunnskólum Kópavogs í rafrænni kosningu. Með því gefst öllum nemendum í grunnskólum bæjarins kostur á að forgangsraða þeim tillögum sem þeir meta mikilvægastar að barnaþingmenn kynni fyrir bæjarstjórn í vor.

 

Styrmir Steinn Sigmundsson, nemandi í 10. bekk í Salaskóla, sagði þingið hafa staðið undir væntingum en hann tók þátt í fyrsta sinn í ár. „Ég vildi mæta til þess að skiptast á skoðunum, hitta skemmtilegt fólk og reyna að hafa áhrif til góða. Ég hlakka svo bara til þess að sjá hvað kemur út úr þessu öllu“. „Ég segi það með þér“, bætti Inga Bríet Valbergsdóttir við, en hún er nemandi í 7. bekk í Snælandsskóla. Aðspurð hvaða tillögur henni þóttu mikilvægastar nefndi hún vettvangsferðirnar. Það skiptir svo miklu máli að fá að upplifa ekki bara að lesa bók, ég tengi miklu betur við efnið þannig.” María Matoc, nemandi í 9. bekk í Álfhólfsskóla, tók þátt í þriðja sinn og sagði þetta alltaf vera jafnskemmtilegt. Hún telur þetta mikilvægt vegna þess að raddir ungmenna skipta máli og hún veit af reynslu að það sem rætt er um hér getur skilað sér í aðgerðum. ” Við sjáum árangurinn, síðast báðum við til dæmis um lyklaborð, þeir nemendur sem eru að koma upp í framhaldsskóla sem hafa ekki haft aðgengi að lyklaborðum áttu erfitt með fingrasetningu. Það var brugðist mjög fljótt við og nú erum við öll komin með lyklaborð”.