Fjölbreytileika fagnað í forvarnarviku

Í ár verður forvarnarvika í Kópavogi haldin undir yfirskriftinni fögnum fjölbreytileikanum.

Forvarnardagurinn verður haldinn 6. október nk., en dagurinn er haldinn af frumkvæði forseta Íslands.

Í Kópavogi hefur undanfarin ár verið haldin sérstök forvarnarvika í stofnunum frístundadeildar á menntasviði í tilefni forvarnardagsins, en dagskráin hefur verið fjölbreytt og með ýmsu sniði undanfarin ár.

 Í vikunni verður áhersla lögð á að bæði efla vitneskju ungmenna um hinsegin málefni ásamt því að forráðamönnum mun standa til boða að taka þátt í fræðsluerindi Margrétar Sigurðardóttur  uppeldis- menntunarfræðings og eiganda fyrirtækisins Verum góð, um hinsegin málefni mánudaginn 4. október kl 20:00 á Teams.

 Á forvarnardaginn sjálfan miðvikudaginn 6. október munu allar félagsmiðstöðvar og ungmennahús í Kópavogi vera með hinsegin fræðslukvöld en þó með mismunandi sniði. En starfsfólk félagsmiðstöðva og ungmennahúss sátu nýlega námskeið og fengu þjálfun í að ræða og vinna með hinsegin málefni.

Félagsmiðstöðvar eldri borgara í Kópavogi munu sömuleiðis taka þátt í Forvarnarvikunni og mun einn vinsælasti fyrirlesari landsins í dag Pálmar Ragnarsson halda fyrirlestur sem slegið hefur í gegn um jákvæð samskipti. Í fyrirlestrinum fjallar hann um hvernig við getum náð því besta fram úr fólkinu í kringum okkur með góðum samskiptum.