Grænlensk börn í skólasundi í Kópavogi

Hópur grænlenskra barna dvelur nú í Kópavogi við sundiðkun, nám og leik. Meðal þess sem börnin gerðu í vikunni var að sækja Bessastaði heim þar sem forseti Íslands, Guðni Th. Jóhannesson, tók vel á móti þeim.

KALAK, vinafélag Grænlands og Íslands, hefur frá 2006 í samvinnu við Kópavogsbæ, Hrókinn og fjölmörg fyrirtæki boðið ellefu ára börnum af austurströnd Grænlands til tveggja vikna dvalar á Íslandi. Aðaltilgangur fararinnar er að kenna börnunum sund og kynna þau fyrir jafnöldrum sínum og íslensku samfélagi.

 Þetta er í tólfta sinn sem börnin læra sund í Kópavogi. Skóladagurinn hefst klukkan 8 með eins og hálfs tíma sundtíma í Sundlaug Kópavogs hjá Guðrúnu Eiríksdóttur og Haraldi Erlendssyni. Þá tekur skólastarf með jafnöldrum sínum í Kópavogs- og Snælandsskóla. Eftir hádegi er svo sundkennsla á ný. Að sögn sundkennara er það unun að fá að kenna börnunum að synda, því þau eru svo spennt og jákvæð að takast á við nýja hluti.

Meðal skólaverkefna sem börnin hafa tekið þátt í með íslenskum jafnöldrum sínum má nefna list- og verkgreinasmiðjur, útikennslu og tónmennt. Þrátt fyrir tungumálaörðugleika hefur allt samstarf gengið ljómandi vel.

Margir aðilar leggja sitt af mörkum við að gera dvöl barnanna sem ánægjulegasta. Þau fara í bíó, heimsækja Húsdýragarðinn og skautahöllina, Alþingi og Bessastaði, fara á hestbak og ferð um gullna hringinn svo fátt eitt sé nefnt. Þá hafa fyrirtæki í Kópavogi styrkt börnin, en BYKO gaf sundpoka og Rúmfatalagerinn handklæði sem börnin fengu afhent við komuna.