Hinrik Snær frá Þebu varð í efsta sæti

19.01.2012 Fréttir
Hinrik Snær Guðmundsson frá félagsmiðstöðinni Þebu í Smárakóla.
Hinrik Snær Guðmundsson frá félagsmiðstöðinni Þebu í Smárakóla.

Hinrik Snær Guðmundsson, frá félagsmiðstöðinni Þebu í Smáraskóla, sigraði í árlegri söngkeppni félagsmiðstöðva í Kópavogi á mánudagskvöld. Hann ásamt þeim sem lentu í öðru og þriðja sæti tekur þátt í söngkeppni Samfés sem fram fer í Laugardalshöllinni í mars.

Hinrik Snær lék á fiðlu og flutti lagið Fairytale en það lag gerði frægt norski fulltrúinn Alexander Rybak í Eurovision söngkeppninni árið 2009.

Ester Rós Brynjarsdóttir og  Arnar Ingi Ingason, frá félagsmiðstöðinni Jemen í Lindaskóla, urðu í öðru sæti með lagið  What a feeling. Og Þórunn Soffía Snæhólm, frá félagsmiðstöðinni Kjarnanum í Kópavogsskóla, varð í þriðja sæti með lagið Make you feel my love.

Söngkeppnin fór fram í Salnum og kepptu níu atriði til úrslita, eitt atriði frá hverri félagsmiðstöð í bænum.

Fjölmargir fylgdust með keppninni og studdu sína fulltrúa og var andrúmsloftið rafmagnað þegar úrslitin svo loks voru kynnt.

Aftur í yfirlit