Kópavogsbær höfðar mál til ógildingar úrskurði innviðaráðuneytisins

Kópavogsbæ barst þann 2. maí síðastliðinn úrskurður frá innviðaráðuneytinu þar sem ákvörðun Kópavogsbæjar um úthlutun lóða og byggingarréttar að Roðahvarfi 2-36 og 1-21, frá 11. júní 2024 var felld úr gildi á þeim grundvelli að hún færi í bága við 11. gr. stjórnsýslulaga.

Verktaki sem ekki fékk lóð úthlutað taldi að annmarkar hefðu verið á úthlutun og kærði ákvörðunina til innviðaráðuneytisins 24. júní 2024. Gerði hann þá kröfu annars vegar að hin kærða ákvörðun yrði ógild og hins vegar að réttaráhrifum hinnar kærðu ákvörðunar yrði frestað. Þann 29. júlí 2024 kvað ráðuneytið upp þann úrskurð að ekki væru fyrir hendi skilyrði til frestunar réttaráhrifa og er það rökstutt á þann máta að Kópavogsbær gat á engan hátt séð fyrir þá niðurstöðu sem ráðuneytið komst að 2. maí 2025, níu mánuðum síðar.

Kópavogsbær er ósammála þeirri niðurstöðu ráðuneytisins að slíkir annmarkar séu á málsmeðferð að það eigi að valda ógildingu úthlutunarinnar í heild sinni. Þeir aðilar sem fengu lóðum úthlutað uppfylltu öll hæfisskilyrði. Eins var gætt að fjárhagslegri hagkvæmni við útboðið, þar sem lóðunum var úthlutað til þeirra aðila sem áttu hæstu tilboðin.

Kópavogsbær bendir á að veigamikil rök mæla gegn því að ákvörðun Kópavogsbæjar sé felld úr gildi. Sú niðurstaða er bersýnilega í andstöðu við hagsmuni annarra málsaðila. Að mati Kópavogsbæjar gerir ráðuneytið lítið úr hagsmunum lóðarhafa og þeim ráðstöfunum sem hafa átt sér stað af hálfu þeirra á grundvelli úthlutunarinnar, m.a. við undirbúning framkvæmda, hönnun, gerð samninga við verktaka, og fjármögnun. Þannig virðist ráðuneytið sýna því lítinn skilning að ýmiss konar undirbúningur liggi að baki byggingarframkvæmdum þó svo hinar eiginlegu verkframkvæmdir séu ekki hafnar.

“Úrskurðurinn er í hrópandi ósamræmi við þá niðurstöðu ráðuneytisins að hafna því að fresta réttaráhrifum. Sá dráttur sem var á úrskurði ráðuneytisins ásamt því að hann er að mati Kópavogsbæjar efnislega rangur, gerir það að verkum að Kópavogsbær hefur ekki aðra kosti í stöðunni en að láta reyna á gildi hans. 325 dögum eftir að úthlutun hefur átt sér stað og úrskurður er birtur eru í gildi samningar við þá þrjá aðila sem áttu gilt tilboð. Hagsmunir Kópavogsbúa kalla á að niðurstaða ráðuneytisins sé borin undir dómstóla og það munum við gera.

Hinn óhóflegi dráttur á málsmeðferð ráðuneytisins sýnir jafnframt skilningsleysi á ferli lóðaúthlutana. Verulegur skortur hefur verið á byggingarlóðum á höfuðborgarsvæðinu á síðustu árum og geta sveitarfélög því ekki leyft sér að stöðva ferli lóðaúthlutana og framkvæmda í heilt ár, þótt fram komi kærur vegna einstakra annmarka á úthlutunum. Málsmeðferðin samræmist ekki málshraðareglu stjórnsýsluréttar að þessu leyti og eru tafir á meðferð málsins af hálfu ráðuneytisins óskiljanlegar,” segir Ásdís Kristjánsdóttir, bæjarstjóri

Lóðarleigusamningar voru gerðir við lóðarhafa um umræddar lóðir í janúar 2025 og hefur þeim verið þinglýst á lóðirnar. Lóðarleigusamningarnir eru enn í gildi þrátt fyrir úrskurð ráðuneytisins. Lóðarhafar hafa þegar hafist handa við að hanna hús og hluti hefur sótt um byggingarleyfi.

Kópavogsbær hefur sótt sér óháða lögfræðiráðgjöf vegna málsins og tekin var sú ákvörðun á fundi bæjarráðs 8. maí síðastliðinn að fela bæjarstjóra að undirbúa málshöfðun þar sem látið verði reyna á gildi úrskurðar ráðuneytisins fyrir dómstólum, enda megi færa rök fyrir því að úrskurðurinn sé haldinn verulegum annmörkum að formi og efni til. Farið verði fram á flýtimeðferð fyrir dómi til að niðurstaða liggi fyrir sem fyrst.