Landsátak í sundi

Syndum er landsátak í sundi í nóvember.
Syndum er landsátak í sundi í nóvember.

Íþrótta- og Ólympíusamband Íslands (ÍSÍ) í samstarfi við Sundsamband Íslands stendur fyrir landsátaki í sundi frá 1. til 28. nóvember 2021. Syndum er heilsu- og hvatningarátak sem höfðar til allra landsmanna. Markmiðið með Syndum er að hvetja almenning til þess að hreyfa sig oftar og meira í sínu daglega lífi og nota meðal annars sund til þess.

Í Kópavogi eru tvær almenningssundlaugar, sundlaug Kópavogs og Salalaug og eru gestir þeirra hvattir til þess að taka þátt í landsátakinu.  

ÍSÍ vonast til að landsmenn á öllum aldri taki þátt í átakinu, skelli sér í laugarnar í nóvember og skrái syntar vegalengdir á síðu átaksins, syndum.is. Syndum okkur í gang fyrir veturinn!

 Til þess að taka þátt þarf að skrá sig inn á síðuna og fara í Mínar skráningar. Einfalt er að velja sér notendanafn og lykilorð og skrá sínar sundvegalengdir. Þeir sem eiga notendanafn í verkefninu Lífshlaupið eða Hjólað í vinnuna geta notað það til að skrá sig inn. Á síðunni er einnig að finna allar nánari upplýsingar um verkefnið sem og sundlaugar landsins.

Þeir sem skrá sig og taka þátt geta átt möguleika á að verða dregnir út og vinna veglega vinninga.