Myndavefur Kópavogs opnar

08.01.2016 Fréttir

Kvígan Lukka og nýbýlið Lundur á sjötta áratugnum. Lundur stóð neðan Nýbýlavegar, þar er í dag fjölbýlishúsbyggð sem kennd er við býlið. Myndin er úr safni Jóhönnu Markúsdóttur.

Myndavefur Kópavogs hefur verið opnaður. Á honum er að finna gamlar myndir og myndskeið úr Kópavogi sem sýna bæinn á ýmsum tímum.

„Það er ánægjulegt að vefurinn sé kominn í loftið, myndirnar sýna svo glöggt þá miklu breytingu sem Kópavogur hefur gengið í gegnum frá því að þéttbýlismyndum hófst hér á fjórða áratugnum. Þarna eru myndir af margvíslegu tagi sem er gaman að skoða enda segja myndirnar merkilega sögum," segir Ármann Kr. Ólafsson bæjarstjóri Kópavogs.

Afmælisnefnd Kópavogs sem sett var á laggirnar í tilefni sextugsafmælis bæjarins 2015 ýtti verkefninu úr vör.

Unnið hefur verið að undirbúningi vefsins frá því á síðasta ári. Áfram verður unnið að því að bæta við myndum á vefinn og gera hann þannig efnisríkari. Notendur vefsins geta sent inn athugasemdir um myndirnar og þannig bætt við upplýsingum um fólk og staði.

Myndirnar sem nú eru gerðar aðgengilegar á vefnum koma að mestu úr safni Héraðsskjalasafns Kópavogs.

Smelltu hér til að skoða myndavef Kópavogsbæjar.

Bent er á að á forsíðu vefsins er hægt að skoða sögusýningu þar sem saga Kópavogs frá 1940 til ársins 2003 er sögð í myndum.

Aftur í yfirlit

Myndavefur Kópavogs opnar

Fréttasafn