Fræðslumiðstöð í Guðmundarlundi

Leik- og grunnskólar í Kópavogi munu nýta nýtt húsnæði Kópavogsbæjar og Skógræktarfélags Kópavogs í Guðmundarlundi sem fræðslumiðstöð og aðstöðuna í Guðmundarlundi til útikennslu. Húsnæðið verður tekið notkun í sumarlok.

Kveðið er á um notkunina í nýjum samningi um skógrækt og rekstur í Guðmundarlundi sem skrifað var undir í vikunni. Ármann Kr. Ólafsson bæjarstjóri Kópavog og Kristinn H. Þorsteinsson formaður Skógræktarfélags Kópavogs skrifuðu undir samninginn.  

Með samkomulaginu skuldbindur bærinn sig til sig til þess að styrkja Skógræktarfélag Kópavogs í því skyni að félagið taki að sér verkefni vegna skógræktar í Kópavogi, enda komi þau öllum íbúum Kópavogs til góða.

Jafnframt fjallar samningurinn um samstarf aðila við rekstur og umhirðu Guðmundarlundar og frístunda- og þjónustuhúss í Guðmundarlundi. Aðstaðan í Guðmundarlundi verður sem fyrr sagði nýtt af skólum Kópavogsbæjar til útikennslu og frístunda- og þjónustuhúsið sem fræðslumiðstöð meðal annars fyrir grunn- og leikskólabörn í Kópavogi. Kópavogsbæ skal ennfremur heimilt að nýta húsnæðið fyrir fundi og viðburði.

Stefnt er að því Guðmundarlundur bjóði upp á fyrsta flokks aðstöðu til útikennslu þar sem lögð verður sérstök áhersla á náttúrulæsi, umhverfis- og náttúruvernd og áhrif loftlagsbreytinga á umhverfið. Þá verður lögð áhersla á mikilvægi útivistar og lýðheilsu sem er í samræmi við áherslur í aðalnámskrá leik- og grunnskóla.

Skógrækt hefur verið í Guðmundarlundi frá árinu 1960 og er svæðið mjög vinsælt til útivistar.