Skapandi sumarstörf í Kópavogi

26.06.2014 Fréttir
Dúó Nítsikrasíle er hluti af Skapandi sumarstörfum sumarið 2014. Það skipa Hildur Elísa Jónsdóttir …
Dúó Nítsikrasíle er hluti af Skapandi sumarstörfum sumarið 2014. Það skipa Hildur Elísa Jónsdóttir og Hilma Kristín Sveinsdóttir.

25 manns vinna í 13 hópum í Skapandi sumarstörfum hjá Kópavogsbæ í sumar. Viðfangsefnin eru mjög fjölbreytt í ár, snúa að hönnun, tónlist, myndlist, kvikmyndagerð og fleiru. Meðal þess sem framundan er eru bíósýning myndlistarhópsins SonyDong í undirgöngunum við Bókasafn Kópavogs og tónleikar Dúó Nítsirkasíle í áhaldaskúr Vinnuskóla Kópavogs. Báðir þessir viðburðir eru á morgun, föstudaginn 27. júní. Sá fyrrnefndi klukkan 18 og síðarnefndi klukkan 20.

Sólveig Ásta Sigurðardóttir sem hefur umsjón með störfunum hvetur áhugasama til þess að fylgjast með uppákomum hópanna og framvindu verkefnanna gegnum Facebook-síðuna „Skapandi sumarstörf í Kópavogi“. „Við hvetjum fólk einnig til þess að kíkja í kringum sig eða ganga á hljóðið því það gæti leynst gjörningur, myndverk eða hljóðskúlptúr í næsta nágrenni,“ segir Sólveig.

Þátttakendur í Skapandi sumarstörfum eru á aldrinum 18 til 25 ára. Þeir eru á launum hjá Kópavogi í átta vikur og hafa starfsaðstöðu í Molanum.

Aftur í yfirlit