Útskriftartónleikar LHÍ í Salnum

Útskriftarnemar úr tónlistardeild Listaháskólans 2014.
Útskriftarnemar úr tónlistardeild Listaháskólans 2014.

Röð útskriftarviðburða tónlistardeildar Listaháskóla Íslands hefst 26. apríl með tónleikum í Salnum í Kópavogi. Flestir útskriftartónleikanna fara fram í Salnum í apríl og maí samkvæmt samkomulagi sem undirritað var í desember síðastliðnum. Tónleikar útskriftarnemanna eru af ýmsum toga.

Á tónleikunum verða meðal annars flutt mörg ný verk eftir tónsmíðanemendur auk þess sem fram koma tveir einsöngvarar, einleikarar á klarinett, túbu og þverflautu. Þá útskrifast tveir nemendur með diploma í fiðlu- og harmonikkuleik og fjórir nemendur ljúka meistaragráðu í Sköpun, miðlun og frumkvöðlastarfi.

Samkomulagið sem gert var milli lista- og menningarráðs Kópavogsbæjar, Salarins og Listaháskóla Íslands nær til þriggja ára. Þar með verður eins konar uppskeruhátíð LHÍ í tónlist, myndlist og hönnun á menningartorfu Kópavogsbæjar á vorin því útskriftarsýningar meistaranema í myndlist og hönnun verða haldnar í Gerðarsafni. Þess má geta að fyrsta útskriftarsýning meistaranema í myndlist og hönnun var opnuð 12. apríl síðastliðinn og stendur til 11. maí í Gerðarsafni.