Íbúar taki þátt í hverfisáætlun

Bænum hefur verið skipt í fimm hverfi fyrir áætlunargerðina; Kársnes, Digranes, Smárann, Fífuhvamm og Vatnsenda. Markmiðið með vinnunni er að skilgreina innviði hvers hverfis, starfsemi þess og notkun og móta framtíðarstefnu hverfanna. 

Í kjölfar vinnu við Smárahverfi fer af stað hverfisáætlun fyrir Fífuhvamm og Vatnsenda. Að lokum verður unnin hverfisáætlun fyrir Kársnes og Digranes.

Samráð er mikilvægur liður í þessari vinnu við hverfisáætlanirnar. En með auknu samráði gefst íbúum hverfanna tækifæri til að taka þátt í og móta hverfisáætlanirnar.

Því eru Kópavogsbúar hvattir til að fylgjast með verkefninu á heimasíðu bæjarins og senda skipulags- og byggingardeild tillögur um úrbætur eða hugmyndir um breytingar í ábendingarkerfi verkefnisins svo og að mæta á samráðsfundi þegar þeir verða.

Búið er að funda með hverfaráðum allra hverfanna þar sem verkefnið var kynnt. Á næstu dögum verða hverfaráðin kölluð saman á ný þar sem vinna síðust mánaða verður kynnt svo og verkefnin framundan.

Í kjölfar hverfisáætlunarinnar verður metið fyrir hvert hverfi hvort þörf sé á því að vinna lögformlegt hverfisskipulag skv. skipulagslögum.

Taktu þátt í nýju og spennandi verkefni.

Allar nánari upplýsingar eru að finna á heimasíðu verkefnisins.